Orientar e dar temp

In l’anteriura scoula da Ramosch dessan gnir s-chaffidas set abitaziuns pajablas per indigens. Per tour per mans quist intent vaiva la populaziun da Valsot fingià deliberà ün credit da planisaziun da 50 000 francs la fin dal 2023. Implü haja quel on eir dat üna revisiun totala da la planisaziun cumünala, chi’d ha tut la chasa da scoula our da la zona per stabilimaints publics e tilla ha miss illa zona da cumün. Quai es a la fin finala eir statta la premissa per insomma pudair realisar il proget d’abitaziuns per indigens. Ils scolars e las scolaras da Ramosch van insembel cun tuot ils ulteriurs uffants dal cumün da Valsot a Strada a scoula daspö il 2024.

Decisiun definitiva mità december

L’on passà d’instà ha il cumün da Valsot lura preschantà il proget vendschader da la concurrenza e quist venderdi vain in occasiun d’üna radunanza cumünala infuormà davart ils cuosts finals dal proget. «Nus organisain quist’infuormaziun per orientar plü detagliadamaing a la populaziun, uschea ch’ella nun ha directamaing da decider davart cuosts da passa quatter milliuns francs dürant la medemma saira», disch Christan Poo, manader da l’administraziun cumünala a Valsot. El agiundscha cha’l proget per las abitaziuns vain nempe finalmaing trattà e decis dürant la radunanza da preventiv als 16 december 2025.

Set abitaziuns per indigens

Il proget vendschader per la transfuormaziun da la scoula, nempe l’inoltraziun «Caruso» da l’architect Urs Padrun da Guarda, prevezza da realisar set abitaziuns i’l stabilimaint. Tenor Christian Poo haja dat daspö la preschantaziun dal proget be singulas müdadas e pitschens adattamaints. Ma la quantità da set abitaziuns saja restada. «Il böt da l’infuormaziun es da muossar quant cha’l proget gnarà a cuostar, quant fit cha las abitaziuns genereschan e cha la glieud as possa impustüt far seis impissamaints fin pro la decisiun finala», disch Christian Poo. Davart ulteriurs detagls voul il Cumün da Valsot lura infuormar quist ​​​​​​​venderdi saira.

Pro il proget da las abitaziuns nu’s tratta da la prüma iniziativa dal Cumün da Valsot per s-chaffir o sustgnair ideas d’interess public. Eir la nouva butia a Ramosch – chi’d es gnüda fabrichada sülla plazza da scoula a Ramosch ed inaugurada l’on 2023 – es fingià gnüda realisada cun sustegn finanzial dal Cumün da Valsot. Implü ha Valsot eir realisà ün’ustaria in l’anteriura chasa da scoula a Tschlin.