Preventiv 2026 quenta cun in gudogn

En sia seduta dil mardis sera ha il cussegl da vischnaunca da Breil approbau unanimamein il preventiv dalla vischnaunca pigl onn 2026. La decisiun ha el priu per mauns dall’approbaziun alla radunonza communala da venderdis, ils 28 da november 2025. Sco l’administraziun communala da Breil scriva en ina communicaziun als mieds da massa, preveda il budget dil quen da gudogn e sperdita ina sviulta da 16,45 milliuns francs cun in avanzament da biebein 63000 francs. Ellas expensas ein cumpridas amortisaziuns da rodund 940000 francs.

Il preventiv dallas investiziuns pigl onn vegnent quenta cun expensas da brutto 5,2 milliuns francs respectivamein expensas da netto 4,5 milliuns francs. Il cussegl da vischnaunca propona alla radunonza communala da laschar il pei da taglia pigl onn 2026 sin 90% dalla taglia cantunala. Il pei da taglia sin schischom duei restar sin 1,7‰. Milena Arpagaus da Breil ei vegnida eligida dil parlament da vischnaunca ella cumissiun dalla scola.