Tanter fraid e chod

Nossa pumpa da chalur geotermica ha dat sü il spiert davo bod 24 ons. Cha quai nu saja mal, cha quai saja normal, anzi ch’ella haja vivü sur la media. Üna plattina chi dirigia la funcziun da la pumpa da chalur nu funcziunaiva plü. L’analisa dal docter da pumpas da chalur: I voul üna nouva pumpa e magari eir ün nouv boiler. La firma nu detta plü, tocs da reserva neir na.

Pervi dad ün tockin, üna nouva pumpa? A la fin as haja listess amo chattà üna plattina per rimplazzar quella defetta, in Svezia, pro’ls piuniers. Üna firma piuniera sül sectur da pumpas da chalur cun s-choda-aua intergrà ha lantschà in Svezia dal 1973 il prüm s-chodamaint da quist gener.

Insomma, infin cha’l toc da reserva es rivà da la Svezia in Svizra haja dürà. Quatter eivnas in chasa sainza s-chodamaint. I d’eira güsta gnü fraid. Las grondas fanestras in chasa laschan entrar il sulai dürant il di e quel s-choda bain. Impustüt d’inviern cur cha l’angul dal sulai es bass.

Lura ha müdà l’ora. Id es stat trid ed in chasa esa propcha gnü fraid. Ella paraiva ün bloc da glatsch. Dunque nan cun pullovers da lana e putschas chodas. Per furtüna vaina fabrichà aint üna pigna ed üna platta da laina cur cha no vain construi la chasa. In üna «cha-da-fö» voula tantüna ün dret fö. La pigna s’inclegia per s-chodar, la platta per s-chodar e schi’s voul eir per cuschinar.

Dimena n’haja fat las ultimas eivnas bler fö in pigna ed in platta. Meis büro n’haja spostà in chadafö, perche cha be là d’eira bel chodin. Per part d’eira dürant il di dadourvart plü chod co in chasa.

A chasa d’eira evidaintamaing massa fraid, però in general vegna s-chodà bler da massa. Interessant esa, quant svelta chi s’adüsa da viver in üna chasa main choda. Aint il tren, in otras abitaziuns e büros, ma che chalurs! Bod da na tgnair oura. Qua m’es gnüda adimmaint mia nona tirolaisa chi reclomaiva, scha mia mamma daiva massa lönch ajer in chasa. Ella solaiva dir «drfrouren sain schun filea, drschtunken wänige». Dschets sajan fingià blers, morts da la spüzza be pacs.

Her es rivà il tecniker culla plattina da la Svezia. Hoz esa darcheu chod in tout la chasa. Quista columna scriva listess in chadafö. La laina in platta schloppina. Mia musica prediletta.

Susanna Fanzun da Scuol è cineasta libra.