Dapli ch’in job da management

Il cusseglier guvernativ Peter Peyer chala. In mais suenter ses uffizi surpiglia el in job tar ina renumada clinica privata. Tge impressiun ha la populaziun grischuna lura da ses anteriur minister da sanadad? Ha el durant ses temp d’uffizi forsa fatg in plaschair a questa clinica e vegn ussa remunerà cun ina plazza bain pajada?

Martin Bühler remetta ses uffizi. Dus mais suenter esser sortì da la regenza sa metta el a la lavur en il directori da la Banca Chantunala Grischuna. Tge parita fa quai? N’ha l’anteriur minister da finanzas forsa betg surveglià uschè severamain la banca e survegn ussa sco regalin in bel post.

Carmelia Maissen ha er avunda. Trais mais suenter ch’ella ha bandunà il Departament d’infrastructura, energia e mobilitad survegn ella ina plazza lucrativa en in renumà biro d’architectura che planisescha gronds projects per il Chantun. N’è quai betg remartgabel? Tgi sa, sche l’anteriura ministra d’infrastructura ha procurà che quest biro d’architectura survegnia incumbensas.

Cler, i sa tracta sa chapescha da trais exempels inventads – els servan ad illustrar la problematica da la votaziun dals 30 da november e mussan pertge ch’igl è necessari da refusar l’iniziativa da la PPS e da dir GEA a la cuntraproposta.

Era la cuntraproposta annullescha las pensiuns per vita duranta. Ma ella conceda ad anteriurs regents ed anteriuras regentas durant trais onns anc pajaments transitorics. Quels èn necessaris per che mintga commember en la regenza possia sa concentrar fin l’ultim di cumplainamain sin ses uffizi. Tar gliez tutga era ch’ina cussegliera guvernativa sto adina pudair esser independenta ed in cusseglier guvernativ sto pudair prender decisiuns malempernaivlas. Ma tgi che tschertga ina plazza, lezza u lez n’è betg independent e sa nuspescha da decider insatge che fa forsa donn ad in potenzial futur patrun.

Perquai dovri suenter l’uffizi ils pajaments transitorics che porschan temp e spazi per planisar la futura carriera. I fiss tissi per la confidenza da la populaziun, sch’i faschess la parita – sco en ils trais exempels inventads – che singuls commembers da la regenza suandassan forsa agens interess durant il temp d’uffizi.

Mintga regent e mintga regenta gudogna 270 000 francs l’onn. L’argument principal dals adversaris da la cuntraproposta è: Cun questa paja po mintgin metter da la vart in pau raps per finanziar suenter l’uffizi il temp ch’i dovra per tschertgar ina nova plazza.

A prima vista tuna quai bain, ma igl è fallà. Questa paja è cumparegliabla cun la paja d’in manager u d’ina managera en ina interpresa gronda che fa in job pretensius e strapatschant. Commembers da la regenza han era tals jobs pretensius e strapatschants – ed anc dapli. Ina cussegliera guvernativa stat permanentamain sut observaziun da la publicitad, mintga pass vegn registrà. In cusseglier guvernativ sto mintga quatter onns puspè superar elecziuns, quai è in stress. La paja na tegna betg quint da quest squitsch supplementar en la politica.

Pajaments transitorics èn perquai inditgads. Ina carriera politica daventa uschiglio nunattractiva per glieud che sto sa decider: ir en la politica u far carriera en l’economia privata? Là na datti dal reminent betg ina limitaziun dal temp d’uffizi. Entant ch’ina cussegliera u in cusseglier guvernativ sto chalar sin il pli tard suenter dudesch onns, po ina managera u in manager restar en sia plazza fin a la pensiun.