Daplü co be övs in painch
Set homens cun scussals verds sun da la partida actualmaing al cuors da cuschinar a Scuol. La magistra d’economia da chasa Agatha Mengiardi ch’instruischa daspö 38 ons tils dà tips e trics per realisar buns menus. Üna visita ad üna sairada da cuors in chasa da scoula.
Saltimbocca e piccata milanese, lapro amo duos differents risots, e sco dessert üna panna cotta. Quai es stat il menu d’incuort, cur cha RTR ha visità a Scuol, in chasa da scola, il cuors da cuschinar per persunas creschüdas. Manadra dal cuors es Agatha Mengiardi chi’d es daspö 38 ons magistra da cuschinar.
«Mia duonna ha adüna cuschinà 100 %»
La majorità dals homens al cuors sun cuort avant l’età da pensiun obain chi han güsta cumanzà quella – per gronda part han tuots ün’età tanter 60 e 70 ons. I’l cuors vöglian els actualmaing e finalmaing imprender a cuschinar, per uschè eir pudair sustgnair a lur duonnas in cuschina. Guido Parolini conferma quel purtret tradiziunal da la repartiziun da las rollas, sch’el disch: «Mia duonna cuschina fich bain e perquai laschaiva adüna far ad ella!» Ed eir seis collega Albert Mayer ha la sumgliainta motivaziun per frequentar il cuors: «Per mai vaja per chattar nouvas ideas. Eu n’ha gnü adüna a mia duonna chi ha cuschinà 100 % ed eu faiva otras lavurs. Uossa sustegna a mia duonna cun cuschinar – ed eu less eir savair far la cuschina in chamonna da chatscha.» Il partecipant Armon Scandella disch perfin: «Fin uossa savaiva be far övs in painch! Uossa fetscha il cuors per almain imprender a far tschertas robettas.»
Integrar plüssas tematicas
Ma a la magistra Agatha Mengiardi nu vaja in seis cuors be per grams da ris, sduns öli e prisas sal: «Be il mangiar san nun es l’unic factur per restar san. I voul amo oters facturs, sco la chüra da l’ambiaint, il gust e l’umur toccan pro, ed eir da far adöver da prodots regiunals es important. Tuot quels differents aspets prouva d’integrar in nossas sairadas da cuschinar.»
E quel möd d’integrar plüs aspets para da plaschair, sco cha Romedi Castellani conferma invers RTR: «I’s guarda eir ün zich süll’economia, nus discurrin tanter oter eir dal predsch da las mangiativas. Tuot quai dà vairamaing ün purtret plü cumplet da quai cha nus mangiain.»
Far curaschi
Tanteraint sun però eir singuls homens al cuors chi han fingià üna tscherta experienza in cuschina. Els lessan gnir a savair amo ulteriurs tips e trics da la manadra dal cuors, dad Agatha Mengiardi. In general vaja a quella in seis cuors per «s-chaffir üna bun’atmosfera e da far curaschi».
E quel incuraschimaint para da funcziunar pro’l partecipant Flurin Denoth chi disch invers RTR: «Uossa n’haja tschüf ün pa daplü curaschi. Eu n’ha adüna pensà ch’eu nu savarà far quai. Ma vairamaing, far fos nu’s poja bler!»
E natüralmaing vaja pro quist cuors per imprender a cuschinar eir pella cumpagnia – quella sta i’l center e vain vivüda cun baiver a la fin amo ün bun magöl vin.
Ma a la fin dal tuot esa da lavar la vaschella, ingio cha Jachen Andri Gisep es da la partida e disch in riond: «Il lavar giò tocca pro. Quai fetscha amo jent – quai es alch ch’eu sa far bain!»
Gust da leger dapli?