D’ün pajais da tschiculatta al prossem

Rivas lungas cun sablun alv, nuschs da cocos e musica ritmica: Uschea am vaiva figürà Trinidad e Tobago, duos islas i’l Mar Caribic.

Mai nu’m vessa imaginà cha quist pajais tropic cultivescha bös-chs da cacau e prodüa sias aignas tschiculattas. A Trinidad crescha la sorta da cacau «Trinitario», üna spezcha da cacau preziusa e populara pro tschiculatiers sün tuot il muond. Las favas da cacau «Trinitario» creeschan üna tschiculatta cun aroma da frütta, nuschs e fluors.

E Trinidad e Tobago han daplü co 40 tschiculatiers, suvent sun quai pitschnas intrapraisas da famiglia.

Nossa regiun ha üna pitschna fabrica da tschiculatta illa grondezza d’ün studio. Our in üert vegnan las favas da cacau fermantadas, süadas e pulidas, tuot in lavur manuala. Aint il local i’l interiur es la brastularia, la pressa e la producziun dals differents gusts da tschiculatta.

Ils ingrediaints sun fich simpels: cacau, painch da cacau, zücher da chonna e differentas spezchas seguond la sort da tschiculatta. Cun excepziun dal zücher vegnan tuot ils ingrediaints cultivats i’ls cumüns cunfinants.

Il prodot final es üna tschiculatta chi gusta ferm da cacau, fatta in lavur a man cun ingrediaints natürals da la regiun. Las sorts actualas sun: natürala, menta, chanella, ibiscus, nuschnuschchatta ed ün mix da tschinch spezchas in üna tschiculatta.

Noss tschiculatiers han guadagnà premis in concurrenzas regiunalas ed internaziunalas da cacau, ed els exporteschan lur tschiculattas illa Gronda Bretagna ed in America. Eu sun fich superbgia da nossa pitschna fabrica da tschiculatta.

Cur ch’eu viag in Svizra, es mia valisch adüna implida cun tschiculattas da Trinidad. E tuornar tuorna cun tschiculattas svizras. Eu sun per uschè dir ün’ambaschadura da tschiculattas e sun colliada cun duos pajais chi sun renomnats per lur prodots da cacau.

E meis favurit? – La tschiculatta da Trinidad, perquai cha quella gusta propi da cacau. E dal rest: Eu mang eir fich gugent la puolpa chi’d es intuorn la fava da cacau frais-cha.

Manuela Giger viva a Trinidad & Tobago, nua ch’ella maina in’organisaziun da nonprofit.