Lecziun cun musica e art

«Miu num ei Andrina ed jeu astgel ir cun vus tier Vuschetta», ha la menadra dalla girada beneventau. Vuschetta ei la jukebox che s’auda tier l’exposiziun actuala ella Casa d’Angel. Ella combra tras stiva, ell’emprem’alzada, han 12 affons priu plaz el rudi entuorn Andrina Casutt. Sper ella Vuschetta, la maschina sonora. Tgi che entra ella combra e che vul astga eleger da quella in toc musica. Ins smacca sil nuv culla numra dil toc, la maschina enquera la platta fonografica, e gia resuna la musica.

Vuschetta ella Casa d’Angel funcziuna senza muneida, l’applicaziun ei gratuita. «Cu ei deva negins radios, neginas maschinas e negins videos, cantavan nossas basattas e nos basats. Ei vegneva cantau dapertut. E mintga vusch haveva ina colur», ha Andrina Casutt raquintau als scolars dalla secunda classa. Tgei che spetgi els en quella Casa d’Angel savevan lezs buc. El baghetg gest sut il santeri e la baselgia parochiala da Lumbrein ei dapresent l’exposiziun speciala «Tun, Art, e Ti». La jukebox ella combra tras stiva ei in dils exponats che presentan la varietad dalla cultura da musica romontscha. Quest’jamna visetan tuttas classas dalla scola da Cuschnaus l’exposiziun. Per quella caschun ha Marco Coray, il menader e meinagestiun dalla Casa d’Angel, envidau Andrina Casutt sco guida hospitonta.

 Malegiar tuns

Culla jukebox Vuschetta, quei apparat da cult dils onns sissonta e siatonta, ha l’intermediatura da cultura e scenografa, tratg ils affons el mund dalla musica. Attentamein han ils affons tedlau l’introducziun. Tgei colurs ch’els audien, ha Andrina Casutt dumandau. Ella ha smaccau sil nuv dalla maschina da musica e schau ir duas canzuns. Gl’emprem la renomada per chor «La sera sper il lag» da Gion Balzer Casanova. Lu il cuntrast, «Mi’olma» da Mattiu Defuns. «Fussel mai cheu sin quest mund…jeu sun jeu, e ti eis ti», han ils affons udiu. Cuort suenter eran els gia occupai cun malegiar. Andrina Casutt haveva repartiu a mintgin in fegl da dessignar. Sch’els audien las colurs dils tuns, haveva ella dumandau. Els dueigien dessignar sil fegl quellas, malegiar impressiuns e patratgs cun tedlar ils dus tetels. Omisduas canzuns han resunau ord la jukebox ed ils affons han astgau esser creativs.

Tener il det ellas clavs

Enteifer paucas minutas ha la menadra dalla guidada rimnau ils 12 fegls e rasau ora 12 resultats individuals digl experiment sonor. Duront la lecziun ha Andrina Casutt fatg surstar ils affons aunc en auters loghens. Ina gada ella combra gronda sur la stiva. Leu ein instruments senza num exponi. La menadra ha raquintau ch’in artist hagi fatg quels. Aschia ina roda, vid quella pendan biaras clavs veglias. Cun ir entuorn la roda e tener il det ellas clavs ha ina melodia resunau.

Era a bischels e dartguirs da metal ha gl’artist dau ina nova funcziun sco instrument da musica. Ils affons ein seconfruntai buca mo cun musica, mobein – a moda ludica – cun art. Sco quei che Marco Coray ha confirmau alla FMR, vul la Casa d’Angel slargiar la purschida dall’intermediaziun d’art. Aschia sco ils affons, dueigien era carschi haver pli savens la pusseivladad d’entrar en dialog cugl art.