Tot oter tgi simpel da neir tigl resultat

Tgi la Veiadfier retica (VR) è e resta en veir magnet e tgi Barvogn è igl li dalla veiadafier è er dumengia passada sa verifitgia. Durant dus emdas ò l’exposiziun da fotografias aint igl Museum Alvra dalla VR attratg mintga de en grond public ed igl cass è chegl er sto dumengia passada.

Sivamezde ò alloura gia la premiaziun dallas miglras fotografias fatgas per lung digl tratg dalla VR e chegl aint igl antier Grischun. En grond domber dad interessos ed interessadas è sa raduno a Barvogn aint igl Museum Alvra dalla Veiadafier retica per assister alla premiaziun cun rangaziun dalla concurrenza da fotografias. Roman Sommer, igl president digl cunsegl d’administraziun digl museum è sto incanto tgi tanta gliout ò catto la veia a Barvogn per saveir tge fotografs tg’on catto igls davos dodesch meis igls pi bels motivs dalla VR e tgi gudognan graztga a lour fotografias la concurrenza. Digl reminent ò chella gia chest onn per la terza geda.

33 fotografs ed ena fotografa

Tgi la VR è anc adegna ena veira passiun e domena dalla schlattagna masculina conferma bagn er tgi alla concurrenza da fotografias «Fair Foto Contest 2025» èn sa participos 33 fotografs ed en’unica fotografa. Menziuno seia tuttegna tgi igls fotografs èn betg professiunals, mabagn amatours. Remarcabel è bagn tgi tranter igls participants eran betg angal blers fotografs svizzers, mabagn er fotografs da quatter otras naziuns. Chegl è eneda daple la conferma tgi la VR è en product internaziunal scu strousch en oter aint igl Grischun. Inoltradas per la concurrenza èn neidas 109 fotografias. Igl taimp per far ellas ò cuzzo digl 1. da november 2024 anfignen igls 12 d’otgover 2025.

Quatter categorias ò cumpiglia la concurrenza da fotografar. La categoria 1 è stada deditgeida a trens e locomotivas istoricas cun fotos an calour. La categoria 2 cumpigliva fotos an alv a neir cugl madem motiv. Alla lavour da mintga de ed agl menaschi quotidian dalla VR era igl pensum dalla categoria 3 deditgia categoria 4 alloura agl model da locomotiva Ge 4/4 II.

Tot oter tgi simpel per la giuria

Alla giuria on fatg part Tibert Keller, egn digls pi gronds amatours dalla VR digl Grischun e sez en fotograf da vaglia. Peter Böhmer, redactour dalla revista da veiadafier «Volldampf» e Hagen von Ortloff tgi segna tigl emettour da televisiun SWR per l’emissiun «Eisenbahn Romantik». Igls treis giurors on valeto las 109 fotografias tenor ples criteris: atgnadad, caracteristica, perspectiva, realitad, li, taimp ed er tecnica da fotografar.

Tibert Keller ò detg anvers la FMR tgi seia ansomma betg sto simpel d’erueir mintgamai las treis miglras fotografias per las quatter categorias. Savens ins seia betg ia d’accord ed uscheia danovamaintg aveir gia d’eir sur igls codeschs per neir tar en resultat ed ena conclusiun. Bel fiss sch’ins savess dar a mintga fotograf en premi, chegl tgi faschess dantant la concurrenza betg schi interessanta. En fatg plaschevel seia tgi la generaziun giovna mossa grond interess per la VR ed er per fotografar ella, ò punctuo igl giuror Hagen von Ortloff. El è sto tot cuntaint tgi tranter igls premias era en bel domber persungas giovnas.

Tiziano Gerber uriund d’Alvagni

Per far belas fotografias dalla VR dovrigl en bung apparat da fotografar, fitg bler taimp, anc daple pazienztga e impurtant è d’esser igl dretg mument agl dretg li. Gist tot chegl è d’attribueir a Tiziano Gerber, igl cumpogn da 18 onns tg’è d’Alvagni e stat a Reichenburg aint igl cantun Sviz. El fò tar la VR en amprendissadi da construeider da binaris. Sia gronda passiun è da fotografar cunzont trens e locomotivas, ma er motivs dalla nateira. Tiziano Gerber ò gudagnea la categoria 3. Catto igl motiv victour ò el tranter Litzirüti ed Arosa. El vegia fatg plessas fotografias e per la concurrenza tarmess la miglra, damai la dretga cun el gudagner igl amprem premi dalla categoria 3, lavour e travagl quotidian tar la VR. Igls oters victours èn Felix Stutz, Lars Graf ed Urs Jossi.