Lectura Rumantscha
La Lectura Rumantscha dad oz porta cumbinaziuns extraordinarias: Dario Cologna e la Bibla, in iert ed enviern e la fin da trais sin tschintg cun tempo.
Dario Cologna e la Bibla
La «Schweizer Illustrierte» cun Dario Cologna sper ina bibla rumantscha datada dal 1679 – quella cumbinaziun sin l’emprima egliada scurrila è da chattar en la Biblioteca Jaura a Valchava. Quella rimnia tut davart la Val Müstair e davart il rumantsch, ha declerà reverenda Hans-Peter Schreich ch’è stà durant 38 onns bibliotecar a Valchava: «Bibla u Cologna, quai na fa nagina differenza.» Uschia che quella cumbinaziun para sin la segunda egliada dal tuttafatg logica.
Vanzadiras enstagl ladim
Vitus Bass da Sogn Benedetg sur Sumvitg è in ortulan passiunà. El cultivescha tartuffels, carottas e giabus ensemen cun la natira e betg encunter cun tissis, sco ch’el di. El na dovra betg ladim sco grascha, mabain dat enavos las vanzadiras da la racolta a l’iert. Ed ils verms fan lura il rest, uschia ch’i crescha l’auter onn puspè giabus da records.
Cun tempo schlargiar sin tschintg
La suprastanza da la vischnanca Medel consista da trais commembers. Che quai funcziunia be cun tantas persunas, saja perquai che tuts èn pensiunads. «Uschiglio na giess quai betg», ha declerà il president communal Claudio Simonet. Perquai vul la vischnanca schlargiar la suprastanza sin tschintg persunas e quai en in tempo nunditg: La preschentaziun dal model è stada la fin october, la votaziun è la fin november e l’entschatta 2026 duain tschintg persunas seser en la suprastanza.
Bun divertiment cun las cumbinaziuns da la Lectura Rumantscha!
Gust da leger dapli?