Digl onn 2024 nunemblideivel
Sonda ein ils da Trun s’entupai ella halla plurivalenta per finir in capetel impurtont: Gl’onn 2024 ei stau in veritabel onn historic. Beat Manetsch ha presentau il film ch’el ha fatg dallas festivitads «Sut igl Ischi 2024». Il medem mument ha Lotar Tomaschett presentau la retrospectiva en fuorma dil cudisch commemorativ.
L’ediziun seigi limitada sin 600 exemplars, ed il giubileum s’accordi gest cun quella cefra. Sonda sera ha Lotar Tomaschett presentau il cudisch ch’el ha realisau per incumbensa dalla vischnaunca da Trun. Igl 1. da december 2021 ha la radunonza communala lubiu il credit per las festivitads. Gia lu eis ei stau clar ch’ei detti in cudisch che regorda agl onn 2024. «Pil giubileum da 500 onns haveva la vischnaunca engaschau treis fotografs. Quella gada ha ins confidau quella lavur mo al pedel», ha Lotar Tomaschett detg surriend.
Da tuttas uras en tuts loghens
Enqual risada ha ei dau duront la presentaziun dil cudisch. Il fotograf ha mussau in e l’auter detagl dallas fotografias. Mintgina ch’el ha selecziunau ei speciala per l’in ni per l’auter motiv. La documentaziun fotografica «Sut igl Ischi 2024 – 600 onns Ligia Grischa – ina retrospectiva»e ha occupau Lotar Tomaschett duront pli che dus onns. Da tuttas occurrenzas festivas, da tuttas uras ed en tut ils loghens, ha el fatg circa 3000 fotografia, da quellas ha el publicau 277 el cudisch.
Gl’onn 1924 era ei stau pusseivel fetg limitadamein da far ina documentaziun filmica dallas festivitads. Pil giubileum 2024 ha il comite d’organisaziun engaschau in um dil vitg per quell’incumbensa. Sonda sera ha Beat Manetsch presentau l’emprema gada il film ch’el ha fatg dallas festivitads «Sut igl Ischi 2024 – 600 onns Ligia Grischa». Per SRF ha el produciu biars onns denter auter il Basel Tattoo ed il tscheiver da Basilea. A siu vitg patern Trun ha el vuliu far il survetsch e documentar las diversas occurrenzas festivas.
Ina part dalla qualitad dalla fiasta
«Ina schanza sco quella dat ei mai pli», hagi el detg a sesez cun surprender l’incarica. Ch’ei vegni denton schi grond e schi bia havessi el maina sminau, ha Beat Manetsch schau valer. Avon che mussar l’emprema part dil film commemorativ ei il president communal Dumeni Tomaschett ius cun el sin tribuna per far in cuort raschieni. Il film dueigi resplender quei ch’ei schabegiau, ei seigi ina part dalla qualitad dalla fiasta, ha Beat Manetsch puntuau. Il film entscheiva cun in prolog, igl ei las scenas che muossan co la politica communala ha priu la decisiun da realisar «Sut igl Ischi 2024» e da garantir las finanzas.
Suenter il prolog suondan las grondiusas scenas dallas manifestaziuns: Ils divers concerts, cant e musica, il teater, adina ha Beat Manetsch filmau. L’entira producziun cuozza circa 95 minutas. Da tschiens uras material ha el stuiu tagliar e reducir. El ha documentau il cussegl da vischnaunca, sentiu adina puspei il puls dil president communal Dumeni Tomaschett. Lez empeila ils aspectaturs ed ei il fil tgietschen, element central ei denton la musica. Commuentai han ils da Trun viu el film lur convischin permiert Magnus Manetsch. Quel haveva surpriu il presidi dil comite d’organisaziun ed ei morts ils 29 da fenadur 2023 nunspitgadamein d’ina daguota.
Treis opiniuns
Alexi Nay
Quei ei stau ina sera fetg impressiunonta. Ins ha viu tut e tgei massa ch’igl ei vegniu prestau a Trun duront quei 2024. Conta glieud ch’ei stada involvada ed era emoziunalmein ha quella presentaziun dil film e dil cudisch fatg endament bia. Emoziunalmein han ins saviu ir tras puspei tut quels muments e las differentas parts da quei onn da giubileum. In grond cumpliment a tut quels che han contribuiu. Il film ed el cudisch muossan bein ch’ei ha dau glieud che ha fatg ina massa e glieud ch’ei segidada cun pintgas caussas. Ei ha denton duvrau omisdus, gliez ei gl’essenzial pil success da tut quels projects.
Christoph Cajöri
Jeu hai constatau duas caussas admirablas: Gl’emprem ei ch’ins fa insumma ina tala revista da quei onn nundetg, cun quellas producziuns enormas e variontas. Sco secund sto jeu dir ch’jeu sai veramein ord atgna experientscha ch’in program da tala dimensiun dat bia lavur. Tgei grondissima prestaziun che l’entira vischnaunca ha fatg, cun tschiens persunas davon e davos las culissas, quei ei tenor mei strusch da capir. Ch’in vitg persul cun ses habitonts sa far ton, ei nundetg impressiunont. Il film ed il cudisch documenteschan quei culla medema qualitad sco las producziuns.
Flurina Bundi Steiner
Quei ei stau ina fetg biala sera. Il film ed il cudisch resumeschan tut quei ch’ei capitau e cun tuttas preparativas. Ins ei adina stai dalla partida zanua ed aschia eis ei stau interessant da prender neunavon tut quei. Las emoziuns han buca muncau. Ella sesida dil cussegl da vischnaunca il 2021, cu ei mava pil credit e per la finanziaziun, era tut veramein aunc ellas steilas. Jeu astgel propi dir ch’jeu sundel loscha da s’uder tier quella vischnaunca che ha realisau tut quei ch’ei schabegiau il 2024. Ils organs dalla vischnaunca han fatg curascha che nus dumigneien communablamein aschia enzatgei.
Gust da leger dapli?