Nouva promoziun dal lö coordinada

I’l rom da l’Agenda 2030 realiseschan ils cumüns da la Regiun Engiadina Bassa/Val Müstair (EBVM) üna promoziun dal lö coordinada. Quai in connex cul svilup regiunal, chi realisescha progets regiunals e spordscha eir cussagliaziuns singulas per affars locals. Sco cha la Regiun EBVM scriva in üna comunicaziun, vegnan las sportas per promouver plans da business, chi cuntgnaivan i’l passà pitschnas contribuziuns à fonds perdu, abolidas i’l futur pervi da lur efficacità limitada. Quai ha la Conferenza da presidents da la Regiun EBVM decis in si’ultima sezzüda als 20 november 2025.

Impè da contribuziuns, vegnan ils mez finanzials in avegnir investits daplü in progets regiunals, intant cha las sportas etablidas per cusgliar e per sustegner tematicamaing singuls affars vegnan rinforzadas inavant. Quai stuvess güdar a promouver il svilup regiunal in möd persistent e pussibiltar la realisaziun da progets cun effet plü grond.

Strategia per la fuormaziun professiunala dal Grischun dal Süd

Ultra da quai ha la Conferenza da presidents da la Regiun EBVM eir decis üna contribuziun maximala da 20 000 francs per üna nouva strategia pella fuormaziun professiunala dal Grischun dal Süd. Il böt da quella es da mantegner e da sviluppar inavant las scoulas professiunalas a Samedan, a Poschiavo ed a Sta. Maria per pussibiltar eir i’l futur sportas da scolaziun chi’s rechattan dastrusch al domicil da las persunas giuvnas i’l Grischun dal Süd. Il process da strategia dess gnir realisà in stretta collavuraziun tanter las Regiuns Malögia, EBVM e Bernina e stess cumanzar la prüma mità da l’on 2026.

Üna ulteriura contribuziun da 20 000 francs ha la Regiun EBVM decis per sustgnair l’Agrischa 2026. L’exposiziun agricula, chi’d ha lö ils 25 e 26 avrigl 2026 a Zernez, vain organisada da las societats paurilas da la regiun e fa quint cun var 12 000 visitaduras e visitadurs.

Prossem pass pel sviamaint Susch

Sco ultim punct in sia ultima sezzüda ha la Conferenza dals presidents da la Regiun EBVM decis da deliberar concept per dis-chargiar il trafic a Susch i’l plan directiv chantunal e regiunal. Tal prevezza ün sviamaint al vest dal cumün per redüer il trafic da transit e per augmantar la sgürezza sün via. Davo ün stüdi da trafic cumplessiv e davo ün’evaluaziun da variantas sün plüs s-chalins fuorma l’opziun dal sviamaint la basa per l’integraziun i’l plan directiv chantunal e regiunal. La proposta vain uossa deliberada per mans da l’exposiziun da cooperaziun.