Novas istorgias d’uffants en trais idioms

La chasa editura OSL preschenta actualmain gist quatter novs cudeschs d’uffants en lingua rumantscha. I sa tracta dad istorgias en ils idioms vallader, sursilvan e puter. Tenor ina communicaziun da la Ovra Svizra da Lectura per la Giuventetgna (OSL) vul la chasa editura avrir las portas a giuvnas lecturas e lecturs rumantscha «ad in mund linguisticamain e culturalmain ritg».

Las quatter publicaziuns sa drizzan a giuvens da differenta vegliadetgna: «Star da skis dad A fin Z – Marco Odermatt/Lara Gut-Behrami» (vallader, a partir da 9 onns), «Max, il squilat» (vallader e puter, a partir dad 8 onns), «Sön adieu!» (puter, a partir da 5 onns) e «Max ed ils spérts» (sursilvan, a partir da 6 onns).

La OSL è ina fundaziun ad util public che vul promover dapi passa 90 onns il gust da leger tar la giuventetgna – e quai cun litteratura d’uffants e giuvenils da buna qualitad. Regularmain publitgescha la chasa editura er carnets e cudeschs en lingua rumantscha.

Ils quatter novs cudeschs rumantschs èn venals en tuttas librarias ubain via il shop da la OSL.