Sontg Antona ed igl Fashion Outlet

Durant igl davos onn vaia gia dad eir a luvrar regularmaintg a Landquart aint igl Fashion Outlet, igl taimpel da consum tgi ò er avert la dumengia. E chegl malgro tg’ia sung aglmanc dalla scoletta anse cunter igl capitalissem.

Ma, igl mies patrung ò presto en bus da shuttle durant las lavours da construcziun per ena nova tgesa da parcar aint igl Fashion Outlet. Ed uscheia passantava mintga meis en pêr deis da lavour a Landquart, aint igl tact da diesch minutas tranter las tgesettas da vendita ed en parcadi provisoric. Surtot la dumengia era chel mengia pitschen per la fola da visitaders: babs cun famiglia ed auto bagn lavo e glischanto, giuvenots cun spousa ed auto bagn lavo e glischanto e tats cun tatta ed auto bagn lavo e glischanto. Ed els tots cun la tema tg’igl proxim igls pudess piglier igl davos parcadi ed igl davos calzer da gimnastica tot alla moda e cun rabat. Tge pievelung! Tge cunfar! Tge ambianza da fegn digl mond!

Siva quatter ouras e mez ve e no aint igl tact da diesch minutas veva alloura mintgamai la mia pôssa tg’ia passantav ensanouas sen en banc u ainten en kebab a Landquart. Ma eneda vaia decidia da far oter, va piglia igl mies auto, cumpro en Silserkranz aint igl tancadi sper l’autostrada e sung caro vease vers Mastrils alla tschertga d’en li en zichel pi chiet. Ena veia pulit teissa e stretga am ò mano anfignen se tar la baselgia catolica da Mastrils. «Parcadi angal per visitaders» stava scretg sen ena tavla. Va parco igl auto e sung antro an baselgia. Lezza era veida. Sulet Sontg Antona da Padua, igl patrung baselgia, era lò e tgirava la sia baselgigna digl 17avel tschentaner. Sung alloura ma tschanto cun igl mies Silserkranz sen en banc avant baselgia cun vista stupenta sen la val digl Ragn.

Cun magler igl amprem panign am è ia tras testa tgi chegl fiss gist l’occasiun da dumandar a Sontg Antona da gidar da cattar en object pers. Ma pir cun piglier an bucca igl sagond panign am è neida andamaint la mia giacca da plievgia greisch-blava tg’ia cattav betg ple. Ma oramai tg’ia na la vev mai propa purto gugent, va antschet a magler igl terz panign. «Sontg Antona cattess franc er chel da dus francs tg’am è rudlo da curt sot ena stgaffa aint», am è ia scu proxim tras testa. Pero, i na vess betg randia, la paia da Sontg Antona è ancunaschaintamaintg en tschincung. Igl quart panign: «Ia igl savess dumandar d’am gidar da cattar puspe la levezza tgi la veta veva da gioven.» Ma l’incumbensa fiss mattagn stada mengia greva pigl sontg da Padua.

Ed uscheia vaia maglea panign nomer tschintg e seis e va anc do en davos sguard sen la val digl Ragn ed igls tgesamaints digl Fashion Outlet tgi parevan da surangiu anc en pò pi treids.

Turno alla lavour sunga alloura cuntaint ed an ena pasch. E tottaneneda vaia m’accurschia tge tg’am mantgeva: la pasch! Chella veva pers aint igl battibogl da consum da dumengias. Sontg Antona am ò gido. E chegl sainza tg’ia igl vess gia dumando! Stò esser tgi er igl sontg da Padua è betg en amei digl capitalissem. E tuttegna ò’l anc da bung en tschincung.

Rafael Müller viva cun sia famiglia a Tumein. El è chasarin e chauffeur da bus a Cuira. Il pli gugent va el sin lingia 2 e 4 che na bandunan mai la citad.