Surdà tschintg contribuziuns per projects culturals

Cun ina summa totala da 50 000 francs vegnan sustegnids era quest onn artistas ed artists professiunals. Las premissas èn ch’els hajan dapi almain 2 onns domicil en il Grischun u ch’els sajan colliads stretgamain cun il chantun Grischun u cun la cultura grischuna. La Cumissiun da concurrenza ha giuditgà 23 dumondas ord las spartas da l’art applitgà e da l’art figurativ, da l’istorgia e memoria, da la litteratura, da la musica, dal saut e dal teater. Il schef dal Departament d’educaziun, cultura e protecziun da l’ambient, cusseglier guvernativ Jon Domenic Parolini, ha decidì, sin proposta da la Cumissiun da concurrenza e da l’Uffizi da cultura, davart la surdada da las contribuziuns ad ovras.

Mintgamai 10 000 francs sustegn

Tschintg artistas ed artists survegnan ina contribuziun u in stipendi liber da mintgamai 10 000 francs per lur ovras: Per la sparta musica survegn Robert Grossmann da Seglias, annada 1953, il sustegn per il project «Der Stadtbrand von Chur». Era per la sparta musica vegn sustegnì il project «Undersized empire – eine Klangistallation» da Stefan Kägi (1990) da Winterthur. Per la sparta saut vegn sustegnida Ella Moana Bürkli (2006) da Cuira per ses project «Break the Borders – Cultures in Motion» (stipendi liber). Sandro Livio Straube (1992) da Vella survegn il sustegn per ses project dad art figurativ «Der Traum des Hotel Tarasp». E Jan-Andrea Bernhard (1971) da Strada/Glion survegn per la sparta istorgia e memoria il sustegn chantunal per ses project «Familiengeschichte (de)Prevost(i) [de Praepositis]».