Cader nordic cun nova structura e fuffergnadi da biatlon
La gruppa da cuorsa liunga regiunala dalla Surselva ei sut nova egida. Andriu Maissen, Claudio Maissen ed Eligius Tambornino – tuts da Trun – segnan naven da questa stagiun per l’organisaziun ed ils trenaments. Da niev porschan els als affons e giuvenils era la pusseivladad da fuffergnar el sport da biatlon.
Il diember da commembras e commembers dalla gruppa regiunala da cuorsa liunga dil Team dil sport sin neiv Surselva (SST) ei sereducius constantamein ils davos onns. «Quella situaziun ha schizun menau a discussiuns enteifer il SST, schebein la gruppa duei aunc vegnir mantenida. Ils clubs cun gruppas da cuorsa liunga ein denton stai dil meini da cuntinuar culla gruppa regiunala», di Andriu Maissen da Trun. Ensemen cun Claudio Maissen ed Eligius Tambornino ha el priu las hottas enta maun e scaffiu ina nova structura per la gruppa, cumbinada cun autras finamiras ch’entochen dacheu.
Animar da separticipar
Da sis curridras e curriders dalla gruppa regiunala da cuorsa liunga dalla Surselva digl onn vargau han treis calau ni midau cader. Suenter dus trenaments da fuffergnadi quest onn eis ei reussiu da cumpletar la gruppa cun nov ulteriurs affons e giuvenils, aschia che dudisch ein ussa el cader.
Sco Andriu Maissen di, san tuts dall’annada 2014 e pli vegls separticipar alla gruppa. En quei senn ein era ils geniturs dils affons e giuvenils interessai vegni informai a scret el decuors da quest onn. En quella circulara ein era las finamiras futuras vegnidas formuladas. «Nus havein reduciu il diember da trenaments. El center stat buca la prestaziun, mobein il plascher dils affons vid il sport da cuorsa liunga e biatlon (mira box). Nus lein era promover il plascher da far sport da cumpignia», di Andriu Maissen che ha surpriu la funcziun organisatorica dalla gruppa d’Esther Vonplon da Castrisch.
Las commembras ed ils commembers dil cader separticipeschan allas cuorsas regiunalas dil Cup Energia alpina e tenor giavisch era a cuorsas surregiunalas, respectiv a camps da trenament dalla Svizra Orientala. Basa da trenament ei Trun e contuorn, per part succedan ils trenaments ensemen cul Team Panda dil Club da skis Trun, denton culs trenaders dil SST Claudio Maissen ed Eligius Tambornino.
La suletta via
«La gruppa da cuorsa liunga regiunala sto esser pli presenta en Surselva el senn ch’ella vegn era precepida dils clubs e dalla glieud. Mo aschia sa igl interess dils affons e giuvenils per la gruppa vegnir svegliaus. L’informaziun ed il contact ston vegnir migliurai. Il SST sto daventar pli veseivels e dinamics», puntuescha Andriu Maissen ch’ei era cau-tecnic dil Club da skis Trun. Ils affons stoppien buca esser ils megliers, mo haver il fiug pil sport nordic. «Nus essan perschuadi che quei ei la suletta vera via. Sch’il plascher ei avon maun, vegn era la prestaziun baul ni tard», di Andriu Maissen che ha bunas regurdientschas da siu temps ella gruppa da cuorsa liunga dil SST.
Ch’il fiug ed igl interess da mantener la cuorsa liunga en Surselva ei avon maun, muossa era la collaboraziun dils clubs da skis ils 24 da schaner 2026. Lu organiseschan els communablamein ils dis da giuventetgna e sport da cuorsa liunga dil Grischun a Trun.
Fuffergnar el sport da biatlon
«Swiss Ski less promover pli fetg il biatlon. El vesa bia potenzial da svilup en quei sport. Quei lessen nus era far en Surselva e dar als affons e giuvenils la pusseivladad da fuffergnar en quei sport. Per quei motiv havein nus decidiu da cumprar in equipament persuenter cun buis da laser», di Andriu Maissen. Persuenter ha la gruppa nordica dalla Surselva survegniu sustegn da Swiss Ski e dalla Promoziun dil sport dil cantun Grischun. Igl equipament vegn nezegiaus dil cader regiunal, mo vegn era mess a disposiziun als clubs da skis en Surselva. «Cun quellas buis da laser savein nus trenar empau nua ch’igl ei, era la stad en halla. Persuenter drova ei era buca ina distanza da 50 meters. La soluziun cun laser ei era buca malsegira», puntuescha Andriu Maissen.
Sco tier la cuorsa liunga vesien ils responsabels pil sport nordic en Surselva quella pusseivladad en ina fuorma da far tschaffen als affons e giuvenils pil sport. La finamira ei d’animar ulteriurs affons e giuvenils da far cuorsa liunga ni biatlon. Quest unviern vegnan rimnadas empremas experientschas cul biatlon. Cun Eligius Tambornino – in dils trenaders – ha la gruppa nordica dalla Surselva legreivlamein in specialist sin quei sectur. Plirs onns ha el fatg biatlon sin nivel internaziunal. Denter auter eis el era separticipaus a cuorsas dil cup mundial.
Duess igl interess pil biatlon sesviluppar en Surselva, savessen il SST ed ils clubs da skis allura far ponderaziuns da concretisar quel cun ulteriura infrastructura. (fmr/hh)
Gust da leger dapli?