«Cantad a sunad cun legreia!»

Igl vendargis digls 28 da november 2025, a las 17.00, preschaintan la Cuminànza culturala Val Schons a l’Uniun Rumantscha Grischun Central ad anvidan a la vernissascha digl cudesch «Canzùns par unfànts – dad ier ad oz» an la Stalla Melchior ad Andeer.

Agl rom d’egna pintga feasta, ambalida d’acumpognamaint musical vean preschanto que nov cudesch da canzùns  viglias a novas par unfànts. Igl nov cudesch cuntegna canzùns par unfànts tradiziunalas sco las ancunaschaintas «Andas» near «Gion, Gionet va sulet» a blearas otras canzùns classicas. Igl spezial da que cudesch e, c’igl text tier las ancunaschaintas melodeias e scret an rumàntsch sutsilvan a tudestg. Cun quegl surmùnta que cudesch igls cunfegns linguistics ad anvida unfànts a geniturs da cantar da cuminànza near far musica cuminevla.

Tier mintga canzùn e’gl vagnieu scret duas semplas vuschs par la flauta a harmoneias nuncumplitgeadas pigl acumpognamaint cun la ghitara near cun l’uculela. Las graziusas ilustraziùns adatadas par unfànts darivan da Maria Crottogini-Melchior. Stampo e’l vagnieu igl cudesch da Copy Print Rizzi a Tusàn.

«U a tgea, an scola near da vieadi: Cantad dad òlt quellas canzùns a sunad cun plascher lur melodeias», scriva la Cuminànza Culturala Val Schons agl sieus anvid a la populaziùn.