In bien onn da fatschenta per las pendicularas

Ils 110 dis da skis digl unviern passau han las Pendicularas Sursaissa SA e las Pendicularas Péz Mundaun SA nudau 320 778 entradas primaras. Ensemen han ellas fatg ina sviulta da bunamein diesch milliuns francs e la fin finala in pign gudogn.

Dacuort han las Pendicularas Sursaissa SA e las Pendicularas Péz Mundaun SA salvau lur radunonzas d’acziunaris. «Las duas societads san mirar anavos sin in bien onn da fatschenta 2024/25», scrivan las pendicularas en ina communicaziun als mieds da massa. Las 320 778 entradas primaras ein serepartidas sils 110 dis da skis. Ensemen han las duas societads fatg ina sviulta da bunamein diesch milliuns francs. La fin finala ei sedaus in gudogn da 24 325 francs. Allas duas radunonzas ordinarias dils acziunaris ein Ernst Sax (president), Iso Caduff e Norbert Sax vegni reeligi els dus cussegls d’administraziun ch’ein identics. Da niev en quels entran Fabio Bianchi e Carlo Janka.

Investau en plirs projects

La stad ed igl atun vargau han las duas societads realisau novas plazzas da giug spel restaurant da muntogna a Wali e sil Péz Mundaun ed endrizzau in niev sistem da vendita digital da tickets. La sutgera Triel – Hitzeggen ei vegnida renovada cumpleinamein. Plinavon ei il surpassadi dalla pista da Sursaissa – Lumnezia vegnius currigius. Las pendicularas han era fatg investiziuns els indrezs d’ennevar. Las acziunarias ed ils acziunaris – tut en tut 250 – ein vegni orientai davart ils projects previ. Aschia duei vegnir scaffida ina nova structura d’organisaziun per las duas societads. Ils indrezs d’ennevar Stein – Wali duein vegnir extendi e la sutgera Cuolm Sura – Péz Mundaun duei vegnir renovada totalmein igl onn 2026. Medemamein eis ei previu da renovar il runal Plitschès ed igl indrez da transport Valata – Cuolm Sura. En mira han las pendicularas era la renovaziun totala dils indrezs d’ennevar.