Finanzas communalas anc equilibradas
Ils affars principals da la sesida dal cussegl communal da Domat da glindesdi saira èn stads il budget ed il pe da taglia. Domat fa quint per l’onn 2026, tar custs en cumparegliaziun cun l’onn precedent puspè levamain pli auts da 45,3 milliuns francs, cun in deficit da radund 600 000 francs.
A la sesida dal cussegl communal da Domat è vegnì preschentà in quint pli u main equilibrà – e quai malgrà che las persunas preschentas han era udì che las expensas communalas creschian. Ch’il spazi d’agir a livel finanzial saja en l’avegnir pli stretg, ha dà da pensar il president communal Erich Kohler. Quai haja consequenzas per las investiziuns: «Suenter onns cun grondas expensas sa stabiliseschan ils custs d’investiziuns en il budget 2026 ed ils proxims onns sin in nivel pli bass.»
Franar cun las investiziuns
Las investiziuns vegnan damai diminuidas: Ils plans per l’onn current 2025 prevesevan anc investiziuns da 23 milliuns. Per l’onn 2026 èn previs investiziuns nettas da mo pli var 10 milliuns. Suenter ina fasa intensiva d’investiziuns – cun la construcziun da las abitaziuns per persunas attempadas, la «Residenza Ensemen», e l’avertura da las terrassas dal santeri Sogn Gion – vegn questa diminuziun era beneventada da la Cumissiun da gestiun. Quella reducziun gidia a mantegnair il spazi d’agir finanzial da la vischnanca a lunga vista. Investiziuns necessarias datti en il sectur da vias, da nov èn budgetadas èn 3,8 milliuns francs, tranter auter per la colliaziun sid-ost.
In pitschen plus tar la taglia sin la facultad
La taglia sin las entradas da persunas natiralas vegn calculada pauc sut il budget 2025. Ins spetga in pitschen plus tar la taglia sin la facultad da persunas privatas e giuridicas. Ils custs da persunal en il sectur furmaziun vegnan a crescher considerablamain causa las pretensiuns chantunalas per persunas d’instrucziun en scolina e scola primara.
Grazia a l’egualisaziun da las grevezzas dal Chantun spetgan ins, malgrà l’augment da las expensas, in budget pli u main equilibrà. Il pe da taglia vegn laschà vinavant sin 85 % da la taglia chantunala. En la votaziun finala èn vegnids deliberads unanimamain tant budget sco er pe da taglia unanimain.
En connex cun l’occupaziun da la «Residenza Ensemen» ha il chanzlist Lucas Collenberg anc pudì dar scleriment il glindesdi saira en il cussegl communal: Otg da las abitaziuns affitablas a partir d’avrigl 2026 èn surdadas, per las autras dettia anc discurs.
Gust da leger dapli?