Giuven mastargner da Donat vean premio

Cun schvùnc a schlàntsch lavura Mathias Michael ear suainter igl examen final a Tgazas tier la firma Toscano Stahlbau. Igl plan par igl futur e fatg: Antocen igl schaner lavura igl giuven mastargner tier igl sieus patrùn a Tgazas, suainter spetga la scola da recruts – a suainter quels 300 gis da survetsch turna Mathias Michael anavos tier la si’anteriura plaza d’amprendissadi.

Agl sieus mastregn sco constructur d’indrezs a d’aparaturas (Anlagen- und Apparatebauer) en unidas diferaintas spartas, sco par exaimpel biagear pùnts a halas, lavurs da searas near construir pusalos. Tut igl ple e’gl da montar a produtgear construcziùns metalicas. La materia da scola e fetg pratensiusa. Sen la dumonda tge ca ple ad el igl miglier veda la sia lavur raspunda el: «A mei ple ansasez tut, jou preferesch nigna leztga spezialmeing.» Mo igl segi schon ple bi d’antschever egna lavur ad ear saver fitar ella, dat el tier. Gràndas lavurs cuzan speart egn’ea dus mains.

Egn mastregn ca vess ear plaschieu a Mathias Michael fuss sto igl mecanist da maschinas agricolas, mo quegl eara savens fetg hectic.

Projects custevels da tains

Sper la lavur â Mathias Michael ear blears projects privats ca fatschaintan el sur sonda a dumeingia. Igl sieus auto – egn Ford Escort digl on 1991 – â el savieu reconstruir anzemel cun igl sieus ô c’e garaschist. Par lavurs sco pinar rusnas da ruegna, far or botas a midar igl mecanissem da transmissiùn â el gieu d’investir egna massa uras da lavur. Mo quegl â betga disturbo el. «Or da mintga project se jou amprender. A sch’igl funcziunescha betga l’amprem’ea, dat igl egn’otra veia», declara igl mastargner. Durànt la sia lavur finala â Mathias Michael luvro egn antier on mintga sonda – da la damàn las 7.00 tocen la sera las 23.00 – par fitar igl sieus gril, biagieu or da tocs d’egn vigl Kaiser, egn oldtimer da l’America. Par quella lavur â el cuntanschieu la nota 5,5.

Ear las otras parts digl examen final â Mathias Michael dumagnieu stupent: La cumbinaziùn da la lavur practica, la preschantaziùn digl gril a la part teoretica – c’el â cunsignieu sainza sbagls – â do egn resultat grandius. El e igl miglier partizipànt da la GBC – la Scola professiunala a Cuira, ca instruescha sculars digl Grischùn, da San Gagl a digl Liechtenstein. Cun la nota finala d’egn 5,5 e igl ­amprendist da Donat ear s’anunztgieu a la concurenza «Pestalozzi Stiftepriis» a Turitg. El e igl miglier constructur d’indrezs a d’aparaturas digl cantùn Grischùn, a segl tschentgavel post da l’antiera Svizra. Bùna reclama par igl giuven mat a la plaza d’amprendissadi.

Partgir igl hobi cun la sia amitga

Igl sieus tains liber passainta el bugent anzemel cun la sia amitga sen vieadis cun igl sieus auto a cun fotografar. Cun igl aparat da fotografar tegna el an ragurdientscha igls mumaints spezials – egn hobi c’el tgira schon blears ons. «La camera ve jou cumpro cura ca jou veva zirca diesch ons», saragorda el. Igls dus giuvens visiteschan bugent museums, cursas dad autos near bealas cuntradas. Suainter gust fotografeschan els diferaints motivs. Anzemel tgata igl peer novas ideias ad inspiraziùns par la proxima fotografeia.

Forza e’gl la cumbinaziùn digl anschegn par la mastregnànza, l’imaginaziùn a la rutina da lavur ca fa or egn bùn amprendist. Sch’igl fa alura ànc plascher dad ir a luvrar mintgagi cun schvùnc a schlàntsch, dat igl landeror egn bùn luvraint – egn sco Mathias Michael.