Il Bambin respunda

«En sasez èn las brevs al Bambin u al Son Niclà cun adressas al Pol dal nord u a la via da stailas spediziuns nunconsegnablas, perquai ch’ellas n’èn betg adressadas ad ina chascha da brevs cuntanschibla», declera la pledadra da la Posta, Silvana Grellmann sin dumonda da la FMR. Ma gia dapi ils onns 1950 hajan tut ils lavurants da la Posta l’incumbensa da trametter vinavant tut las brevs – che dattan indizis ch’ellas èn destinadas per il Bambin u il San Niclà – a la centrala speziala dal Bambin a Cadenazzo en il Tessin. «Quai pon en quest cas era esser formats che n’èn uschiglio betg lubids», declera la pledadra vinavant. La Posta saja da l’avis che tut ils uffants, e mintgatant era singuls creschids, che scrivian lur giavischs u tramettian purtrets u zambregims al Bambin, hajan merità ina resposta. «Ma per quai èsi propi impurtant che l’adressa dal speditur u la speditura saja bain legibla ed insumma inditgada», renda Silvana Grellmann attent.

Passa 30 000 brevs per onn

Da l’onn 2012 aveva la centrala dal Bambin survegnì 17 149 brevs – ed onn per onn è il volumen s’augmentà. L’onn passà ha la centrala survegnì 31 754 brevs. Quai enumerescha la Posta en ina statistica minuziusa. Interessant saja che bunamain trais quarts da las spediziuns vegnian dad uffants da la Svizra franzosa e dal Tessin, declera Silvana Grellmann la statistica.

Durant il temp d’advent e da Nadal lavuran otg persunas en il team da nanins dal Bambin per dar resposta a tut las brevs. Mintga brev vegn respundida. Ed i dat perfin anc in regalin vitiers. Tge che quai saja, na possia ella dentant betg tradir, di Silvana Grellmann cun ina tschegnada: «Quai duai restar ina surpraisa per ils uffants.» Era areguard ils custs na discurra la Posta betg. «La Posta na publitgescha naginas cifras davart singuls champs d’activitad. Dentant è la Posta fitg loscha da pudair procurar per egls che traglischan tar ils uffants, grazia a l’engaschament dals nanins».

In salid al tat en tschiel

Onn per onn sajan tranter las millis brevs era fitg bella posta – purtrets dad uffants, glistas da giavischs per Nadal, versins, pitschens regals e zambregims, raquinta Silvana Grellmann. «Mintgatant survegnin nus perfin lullis. Ed i dat era giavischs fitg commovents, sco per exempel uffants che giavischan da laschar drizzar ora al Bambin in char salid al tat en tschiel», raquinta la pledadra da la Posta. E tranteren dettia er adina puspè posta commoventa da persunas creschidas, per exempel da persunas che sa chattan solitarias u da persunas en praschun che giavischan dal Bambin piculezzas dal mintgadi, chaussas che s’enclegian da sezzas per persunas che vivian en libertad.