Treis hotels en treis regiuns che fan cultura

«La finamira dalla cuminonza d’interess dils hotels da cultura el Grischun ei da far pli veseivela la purschida culturala e da sviluppar quella, mo era da promover e formar las valurs regiunalas», di Rico Tuor dil hotel Medelina a Curaglia. El ei staus igl iniziant dils hotels da cultura el Grischun e per quei motiv ei la cuminonza d’interess lu era seformada la fin d’october a Curaglia. Spel hotel Medelina ein il mument dus ulteriurs hotels dalla partida: La Kurhaus Bravuogn ed il hotel Pontisella a Stampa en Bregaglia. Sco Rico Tuor di, duei il diember da hotels che porschan cultura el cantun Grischun vegnir extendius: «La finamira ein la fin finala tschun entochen diesch hotels da cultura en tuttas regiuns linguisticas. Il potenzial ei avon maun e l’entschatta cun treis hotels ei fatga. Nus essan gia en discuors cun ulteriurs hotels interessai.»

Collaboraziun e brat d’ideas

«Ei dat hotels da seminari e hotels historics, mo hotels da cultura deva ei aunc buc. Enteifer l’Uniun Medelina ch’organisescha arranschaments da cultura, essan nus lu i alla tscherca da partenaris», di Rico Tuor. La fin finala ei sedada la collaboraziun cull’Uniun Grischun Cultura purtada digl Institut per la perscrutaziun dalla cultura el Grischun, Grischun Vacanzas, la marca Grischun ed il Post da perscrutaziun da turissem e svilup persistent dalla Scol’aulta per scienzias applicadas Turitg a Vargistagn.

Destinaziun da cultura

La finamira da Grischun Cultura ei da posiziunar il Grischun sco destinaziun dominonta per cultura ellas Alps. «Quei ei cumbinau culla promoziun dils hotels participonts e cheutras cun in svilup persistent era ellas regiuns. Persunalmein spetgel jeu in brat d’ideas entras ils partenaris. Nossa collaboraziun duei denton er esser ina plivalur per artistas ed artists che san sut circumstanzias sepresentar aschia era en auters loghens», di Rico Tuor. Ina dallas finamiras dils iniziants dalla cuminonza ei da s’entupar regularmein treis entochen quater ga per onn per discuorer davart ideas e pusseivladads da collaboraziun. In’autra finamira ei d’arranschar annualmein igl avegnir ina fin d’jamna da cultura alternontamein en in dils hotels da cultura.

Tradiziunal e cultural

Il hotel Medelina a Curaglia en Val Medel ei vegnius aviarts il fevrer 2017. El ei il giuven ella retscha dils treis hotels ch’ein il mument dalla partida ella cuminonza d’interess. Kurhaus Bravuogn ed il hotel Pontisella a Stampa en Bregaglia ein menaschis da gronda tradiziun. Gest quei fa tenor Rico Tuor interessanta la collaboraziun: «Hosps da vacanzas dalla Kurhaus Bravuogn ni ella Pontisella lessan forsa era veser in’autra regiun ed in’autra cultura. Quei ei ina schanza per tschels.» Co il brat e la collaboraziun cun artistas ed artists duei semanifestar, semuossa gia l’entschatta schaner 2026. Il trio PrismE culla pianista Leila Kramer sepresenta da Daniev ella Medelina a Curaglia e silsuenter a Bravuogn e Pontisella.

Vast program

18 differents arranschaments da cultura e tradiziun offerescha la Medelina igl onn vegnent a ses hosps da vacanzas, mo era als indigens. «Tuttas occurrenzas che nus organisein sur l’Uniun Medelina astgan secapescha era vegnir visitadas ni frequentadas dils indigens. Aschia lein nus era promover la cuminonza», di Rico Tuor. La purschida dall’entschatta schaner entochen la fin december cumpeglia concerts, teaters, prelecziuns ed excursiuns. Mo lu era cuors d’artisanadi e mistregn tradiziunal. Aschia san ins emprender da turnar, d’entagliar, far sculpturas da lenn ni da far scuas cun tortas.

Cuors dil mistregn ein tschercai

«Ils cuors dil mistregn ein fetg tschercai. Pil cuors da far canasters il schaner ein 16 persunas s’annunziadas, la mesadad ei indigens. Per che nus hagien plaz avunda per tuts havein nus schizun stuiu affittar stanzas ella casa da scola a Platta», relata Rico Tuor. In vast program da cultura cun concerts ni era luvratoris da scriver ed architectura porscha la Pontisella, ni era la Kurhaus Bravuogn cun excursiuns e fins d’jamna da cultura.