Ün chapè per «ün di da schnuz»
Daspö passa duos ans prodüa Tanja Wüthrich da Puntraschigna chapels in tuot las culuors chi sun ornos cun ün pled u üna frasa per puter. Quist hobi ho pissero cha passa 500 tels chapels rumauntschs haun già chatto lur via da l’Engiadina in tuot la Svizra. Per quist december do la designra da Puntraschigna impü oura üna nouva collecziun cun chapels – e nouv eir chapütschas per l’inviern.
«Eau nu d’he insomma na gugent paraplövgias, per esser sincera als ödiesch eau. Quels guaffens as schmauncha pelpü in ün lö, que nu’s so mê propi inua als depuoner. E na d’inrer rumpan paraplövgias svelt», disch Tanja Wüthrich. Perque ho ella già adüna pront ün chapè u qualchos’oter per cuverner sieu cho e que per tuottas oras pussiblas.
Sia paschiun per chapels nu’s restraindscha però be sün sia egna gardaroba, Tanja Wüthrich prodüa daspö duos ans chapels cha s’inscuntra adüna darcho süls chos da persunas in Engiadina. Il speciel vi da quels sun ch’els sun ornos cun ün pled u cun üna pitschna frasa per puter.
Ses ans e al Lej da las Quatter Forestas
Tanja Wüthrich es creschida sü a Puntraschigna, però cun genituors oriundamaing dal chantun Berna. A chesa esa adüna gnieu discurrieu tudas-ch, e rumauntsch ho Tanja Wüthrich alura imprais a scoula. Plaschair vi dal rumauntsch hegia ella però adüna già gieu, ed ella es düraunt sieus ans da scoula a l’Institut Otalpin a Ftan eir gnida in contact cul vallader. Da quel temp ho ella collegas, cun ils quêls ella discuorra aunch’hoz rumauntsch. Zieva la matura specialiseda a Schiers, ho ella frequento la scoula d’hotellaria a Thun. Quella l’ho mneda a la fin in l’Hotel Vitznauerhof al Lej da las Quatter Forestas. Lo ho ella passanto ses ans e per la granda part dal temp scu vice-directura a l’hotel da quatter stailas.
Ün hobi cun success
«L’ideja pel proget culs chapels d’heja gieu avaunt duos ans, cur cha d’he güdo a fabricher sü ün concept store per l’Hotel Maistra 163 a Puntraschigna. Lo suni turneda in Engiadina e lo vaivans eir chapels i’l assortimaint, però cul messagi ‹From Zurich with Love›», s’algorda Tanja Wüthrich. Que saja a la fin sto il punct da partenza per ella da cumanzer a prodür chapels in egna redschia, però cun ün messagi per puter. Quels venda Tanja Wüthrich suot sieu label «Simone». Que’s tratta dal rest da sieu seguond prenom, chi po tenor ella esser ün nom d’üna duonna u d’ün hom. Cun la schelta da quist nom voul ella eir musser cha sieus prodots sun per tuots duos genders, dimena chapels unisex.
Il label es però aunch’adüna «be» ün da bgers hobis da Tanja Wüthrich. Ella lavura nempe auncha in ün pensum dad 80 % tar San Murezzan Turissem scu mnedra da la sparta Guest Relations. E sper creer chapels passainta la designra sieu temp liber scu paschiuneda fotografa – ed ella ho eir scuviert ün interess per lavuors in ardschiglia.
Già vendieu passa 500 chapels
Il chapels da Tanja Wüthrich do que pel mumaint in ündesch variaziuns, p.ex. culs pleds «allegra», «vin, sulagl e tü» u cul messagi «ün di da schnuz». Scu prüm nun hegia la designra penso cha sieus chapels pudessan avair grand success, surtuot na tar turists chi nun inclegian rumauntsch. «Però güsta als prüms marchos da Laret a Puntraschigna d’heja pudieu vender divers chapels. Güsta quel cul pled ‹pachific› es gnieu stimo ferm, eir dals esters», disch Tanja Wüthrich. Ella agiundscha cha que l’hegia fat grand plaschair da vzair cha’ls turists piglian cun se qualchosa da l’Engiadina e que auncha cun ün pled rumauntsch.
In seguit ho eir il concept store «Murezzan» da Valentina Motti e Claudio Pittin a San Murezzan Bagn piglio ils chapels da Tanja Wüthrich i’l assortimaint. Insembel cun sieu onlineshop ho ella düraunt ils ultims duos ans già vendieu passa 500 chapels.
Chatter l’inspiraziun i’l dicziunari «Buonder cun cornas»
L’inspiraziun linguistica per sieus prodots survain Tanja Wüthrich cun sföglier i’l Buonder cun cornas – ün dicziunari ladin-tudas-ch. «Eau vegn simplamaing in tschercha da pleds chi tunan divertent u interessant e prouv da’ls cumbiner. Que vess a la fin dad esser umur pel minchadi, e na adüna managio dal tuot serius», disch Tanja Wüthrich. Adüna sch’ella ho alura ün pêr idejas, las preschainta ella ad üna amia, chi’d es magistra primara. Quella la cussaglia alura, scha las creaziuns funcziunan u brich.
Scu cha la designra quinta, ho ella auncha ün lungia glista cun nouvs versins e pleds. E da quella glista sun rivos ün pêr chavazzins sün nouvs prodots per la nouva collecziun da chapels da «Simone». Quella vain publicheda quist december e cuntegna sper chapels eir chapütschas i’l medem design. Traunter oter do que in avegnir eir il chapè culs pleds «sainza cunfins».
E sainza cunfins peran eir las idejas per l’avegnir da sieu label da moda, però Tanja Wüthrich as voul lascher temp per quist proget: «Que stu crescher plaun e saun, eir siand cha que es pel mumaint auncha ün hobi. Ma d’avair il success cun mieus chapels puters – e mner uschè ün pô buna glüna i’l minchadi – que’m fo grand plaschair e motivescha da realiser ulteriuras idejas. Da quellas d’heja bgeras.»
Gust da leger dapli?