Vender la claustra da Glion ei ina opziun

La priura generala sora Annemarie Müller ha informau mardis che la decisiun da publicar la claustra per la vendita seigi ina dallas opziuns dil project «Avegnir dalla claustra da Glion». «En nossa claustra a Glion vivan actualmein aunc 61 soras cun ina media da vegliadetgna dad 86 onns», di la priura generala. «Circa la mesadad da quellas soras vivan en nossa casa d’attempadas.»

Alla claustra dominicana baghegiada da niev igl onn 1975 appartegnan oz sper la cuminonza dallas soras era la Casa Sentupada cun 48 combras, la baselgia claustrala che vegn era duvrada fetg stedi per eveniments culturals, il Center da formaziun Surselva ch’ei affitader aunc entochen la fin digl onn da scola 2027/2028, e l’anteriura scola da puras cun combras e localitads. Tier la cuminonza dalla claustra da Glion s’audan plinavon era las soras dominicanas en Brasilia ed el Taiwan. Sora Annemarie Müller e la gestiunaria dalla claustra Caroline Schweisgut han accentuau duront il café cullas medias ch’ei fussi ina incumbensa da mamut da vuler sligiar el futur sezzas tut las incumbensas che spetgien ils proxims onns. La fundaziun ha perquei envidau in biro extern e schau far quel in studi per mirar co l’immobilia dalla claustra duei vegnir utilisada el futur.

Aunc eisi buca vendiu

«Igl ei buc aschia ch’igl ei vegniu fatg nuot» ha la priura generala detg en discuors cun la FMR. «Nus planisein dapi onns nies futur ed jeu sun stada involvada el project ‹Avegnir dalla claustra da Glion› da bial’entschatta.» La vendita seigi l’opziun decidida ch’ins hagi en mira ussa. «Per mei ha la decisiun d’encurir in cumprader duas varts. D’ina vart sun jeu dapi 36 onns part dallas soras dominicanas cheu sut quei tetg ed igl ei ina ponderaziun fetg speciala che la claustra ei in bi di buca pli nossa. Da l’autra vart eis ei era in grond levgiament, sche nus cattein in cumprader adattau che meina la claustra en in bien futur.» Mo oz seigi aunc tut aviert, ha sora Annemarie Müller detg.

«Incumbensa ei ademplida»

All’informaziun da medias dad ier mardis ha la priura generala sora Annemarie Müller argumentau cun plaids clars che la missiun dallas soras dominicanas seigi ademplida. «Suenter 160 onns ei igl apostolat, l’incumbensa dallas soras dominicanas en Surselva, ademplius. Quei surtut risguardond lur lavur sils secturs dalla diaconia e dalla formaziun. La cuminonza dallas soras astga seretrer dalla veta publica ed investir sias forzas restontas per passentar sia sera dalla veta en cuminonza.»

Visiun en cass d’ina vendita

L’immobilia dalla claustra da Glion cumpeglia plirs tracts d’edifecis ch’ein vegni construi entuorn la baselgia. Il studi da realisabladad presentaus la stad 2025 visualisescha il diever futur pusseivel dalla claustra (mira visualisaziun). Sper ils differents basegns datti era ina proposta pil dacasa futur dalla nova cuminonza dallas soras dominicanas (la part «Neues Kloster»).

Las localitads dil Center da formaziun dad oz vegnessan renovadas ed ei dess novas localitads da habitar en quei tract. Las ulteriuras parts dil baghetg savessan vegnir utilisadas per habitadis per famiglias e giuvenils sco era per localitads da lavur e producziun per commerci e cultura. La baselgia dalla claustra duei vegnir mantenida per la cuminonza claustrala e per producziuns da concerts e cultura. L’idea dil cussegl da fundaziun dalla claustra ei da realisar a Quinclas in quartier cun localitads aviartas per la vischnaunca dad Ilanz/Glion e dalla regiun.

Proxims pass

Tenor in scenari dil cussegl da fundaziun dalla claustra dominicana vegn la vendita dalla claustra publicada il schaner 2026. Ins quenta cun in onn da contacts e contractivas entochen alla vendita definitiva.

Alla fin digl onn da scola 2027/2028 banduna il Center da formaziun Surselva la claustra e lu savess ins entscheiver cun las lavurs pil niev habitadi dallas soras. Tenor la priura generala Annemarie Müller fussi ei ideal, sche las soras savessien bardigliar entochen la fin digl onn 2030. A quella midada suandassen tenor la visiun dad oz ils proxims pass da renovaziun e reutilisaziun dalla claustra.