Concert da Cantaurora cun musica da Bach

Il «Weihnachts-Oratorium» da Johann Sebastian Bach pon ins tadlar e giudair ils 6 da december a Tusaun ed ils 7 da december a Cuira. L’ensemble vocal Cantaurora ed in orchester ad hoc chantan e suna las emprimas trais cantatas da questa ovra.

La direcziun dal concert ha Peter Appenzeller. Deborah Fogal (sopran), Nora Bertogg (alt), Rodrigo Carreto (tenor) e René Perler (bass) chantan ils solos.

«Il Weihnachts-Oratorium furma in punct culminant da las cumposiziuns per chant da Bach», di Peter Appenzeller, «il grond cumponist dal temp baroc era gia al cumenzament da sia carriera musicala in avantgardist. Sias improvisaziuns e sias melodias armonisadas en moda moderna faschevan pli baud ed era oz grond effect.»

Ina vista sin la partitura da Bach mussa tenor la communicaziun da Cantautora il plaschair dal cumponist per las trais trumbettas che furman il celestial roial. «Ils sufladers d’instruments da lain laschan cumparair la vita dals pasturs ed ils artgists stgaffeschan la colliaziun armonica da questas atmosferas da Nadal.» Ils concerts sun ils 6 da december en la baselgia catolica a Tusaun ed ils 7 da december 2025 en la Heiligkreuzkirche a Cuira. Els cumenzan a las 20.00. La cassa avra adina 1 ura avant l’entschatta dal concert.