Giosch Albrecht ei morts

1993 ha el fundau la Societad svizra per logoterapia ed analisa existenziala. Il trapassau ei naschius ils 2 da november 1936 a Rueun e carschius si leu. Suenter il studi da teologia ha el era festivau sia messa nuviala en siu liug nativ. Pastorau ha el silsuenter a Turitg e Winterthur. Leu eis el s’engaschaus per la diaspora. Giosch Albrecht ha fundau a Turitg la MICARO, la missiun catolica romontscha da Turitg. A quella ha el dedicau 1970 il cudisch d’oraziuns e canzuns «Levgera ella muschna». En Surselva era el enconuschents sco plevon dalla giuventetgna, sco spért aviert e liberal. Siat onns ei el staus pastur dallas olmas a Zollikon, lu ha el vuliu s’approfundir ella psicologia ed ellas scienzias socialas. Els Stadis Uni ha el doctorau ed ei staus silsuenter assistent dil post da perscrutaziun sociala.

1985 ha el fundau a Cuera il post ecumenic da cussegliaziun da lètg, famiglias e damondas dalla veta. Il medem temps ha Giosch Albrecht baghegiau si egl anteriur Constantineum a Cuera ina instituziun nova. 1993 ha el fundau la Societad svizra per logoterapia ed analisa existenziala. Gl’institut ha el aviert 1995 e menau quel operativa- e strategicamein tochen 2018. El seigi s’engaschaus cuntinuadamein per la derasaziun dalla psicoterapia e la cussegliaziun da veta tenor la metoda da Viktor E. Frankl, san ins leger ell’annunzia da mort digl Institut ch’ei aunc oz domiciliaus a Cuera. Dapi biars onns viveva Giosch Albrecht a Bogn Ragaz. Siu davos ruaus anfla el sin santeri da siu liug nativ. La sepultura ei sonda, ils 5 da december 2025 a Rueun.