Igl pe da taglia resta – igl nov center da seniors ò amprema prioritad

Tenor constituziun digl cumegn da Vaz ò igl preventiv da neir approvo dalla radunanza communala, siva tgi igl parlamaint ò piglia invista da chel ed er delibero el per mangs dalla radunanza. Digl reminent è chegl l’unica radunanza communala tg’ins canoscha aint igl pi grond cumegn da Surmeir.

Igl cumegn da Vaz ò 1770 persungas cugl dretg da votar, damai en bel domber. Alla radunanza communala da glindesde seira a Lai èn stos dalla parteida 148 votants e votantas. Chegl èn stgers 9 % dallas persungas tgi vessan igl dretg dad eir alla radunanza da cumegn. Maurin Malär, igl president communal ò managea tgi en schi grond domber da votantas e votants ins vegia darar gia tar la radunanza da cumegn digl preventiv. El ò er angraztgea agl suveran per la sia reelecziun ed exprimia la speranza sen ena collaboraziun ampernevla scu igls davos quatter onns.

Varsaquantas midadas tigl preventiv

Igl proxim onn chinta igl cumegn da Vaz cun antradas da 61,83 milliuns francs ed alla fegn finala cun en gudogn da 3,5 milliuns francs. Manfred Fiegl, igl parsoura dalla cumischung da gestiun ò cunsiglia agl suveran d’approvar igl preventiv.

Or digl mez dalla radunanza èn nias ples votums per far ena midada tigl preventiv. Uscheia ò igl suveran decidia d’augmentar la contribuziun per la tgira digl de an scola e pigl accumpognamaint quotidian digls unfants da 73 327 francs sen 200 000 francs. Chella midada è neida acceptada cun 93 : 31 vouschs tar 16 abstenziuns.

Betg accepto – e chegl cun 50 : 68 vouschs e 22 abstenziuns – è nia igl dulzamaint dad 80 000 francs sen da nov 100 000 francs per ambelleir las fracziuns digl cumegn da Vaz cun flours, decoraziuns ed ornamaints. Or digl mez dalla radunanza è neida la proposta d’agiuntar la tavla da bavegna a Valbella tudestga er cun rumantsch. Igl resultat è sto 102 : 6 vouschs tar 35 abstenziuns.

Igl 2026 investescha igl cumegn da Vaz an ples projects e chegl per ena somma da 16,5 milliuns francs. Maurin Malär ò detg tgi las investiziuns seian finanzialmaintg supportablas. I dovra ellas per migliurar aint igl cumegn da Vaz la qualitad da veiver, per garanteir igl preschaint ed er igl avigneir. Igl preventiv digl chint current e digl chint d’investiziun è nia accepto sainza cuntervouschs.

Siva digl 2017

Ena ulterioura tractanda è sto glindesde seira da fixar igl pe da taglia communal pigl 2026. Igl december 2017 veva la radunanza communala digl cumegn da Vaz decidia cun 73 : 51 vouschs da sbassar igl pe da taglia communal dad 80 % sen da nov 70 %. Damai schea igl pe da taglia communal digl cumegn da Vaz siva da set onns tar 70 %. Digl 1980 anfignen igl 2017, damai durant 37 onns, è igl pe da taglia digl cumegn da Vaz sto fixo sen 80 %.

Areguard igl pe da taglia actual da 70 % è dalla radunanza communala da glindesde seira a Lai betg crudo en sulet pled or digl mez digl pievel cumegn. Unanim on igls preschaints e las preschaintas decidia da lascher igl pe da taglia communal scu anfignen ossa sen 70 % dalla taglia cantunala simpla.

Ena societad d’aczias pigl center da seniors

Maurin Malär ò detg tgi absoluta prioritad vegia igls proxims onns pigl cumegn da Vaz cleramaintg la realisaziun digl nov center da seniors. Siva da ples onns ins seia vedlonder cun chel project, pigl qual seian nias mess ples pals an veia cun dus recurs. Chels seian ossa istorgia ed ossa scumainza la nova fasa da projectar e realisar igl nov center da seniors.

A pled è nia an chella tgossa Urs Simeon tgi segna tar la Fanzun SA per la direcziun, en travagl per architectura e planisaziun. Per realisar igl nov center da seniors vigna fundada ena societad acziunaria, ena schinumnada societad d’immobiglias e menaschi. Gremi superiour da chella societad èn igl cumegn da Vaz ed igl cumegn da vaschigns da Vaz. Chels vignan er ad esser represchentos mintgamai cun ena persunga aint igl cunsegl d’administraziun. Urs Simeon ò detg tgi las otras treis persungas tgi appartignan agl cunsegl d’administraziun duessan esser digl rom chegl tgi pertotga la tgira, aveir experientscha cun finanzas e cunzont er cun fatgs d’immobiglias.

La fegnameira seia da manar igl nov center da seniors cun pudeir cuvreir igls costs, eventualmaintg er cun subvenziuns traversalas. Vetiers vign igl tschains dalla buteia integrada aint igl project ed er igl tschains dallas abitaziuns. Cun surpiglier igl cumegn politic da Vaz igls costs da mantignamaint dalla tgesa da parcadi digl nov center da seniors seia avant mang pigl travagl en burdi finanzial pi pac. Igl cumegn politic da Vaz vign a metter a disposiziun ena somma da 250 000 francs scu capital da partenza per fundar la societad acziunaria.

Cun bler tgatsch e grond angaschamaint

Ossa tgi igls recurs cunter igl project digl nov center da seniors seian giud meisa, ins possa cuntinuar cun bler tgatsch e cun grond angaschamaint cun planisaziun e projectaziun digl nov object, ò detg Maurin Malär.

Digl reminent, igl taragn noua tgi igl nov center da seniors duess neir realiso è an possess digl cumegn politic da Vaz e digl cumegn da vaschigns da Vaz. Gio igl schaner 2026 duess igl parlamaint sa fatschentar cugl nov center e durant igl meis da favrer è preveida ena seira d’infurmaziun per la populaziun. Ed alla fegn finala igl zarcladour 2026 decidia igl suveran all’urna.

En de pi tard vign scretga or la concurrenza d’architectura pigl nov project d’en center da seniors, la societad acziunaria duess neir fixada aint igl register da commerzi e la stad 2027 duess esser ancunaschaint igl victour dalla concurrenza d’architectura. La premaveira 2029 duess aveir li l’amprema badigleida digl nov center da seniors, ò detg Maurin Malär.

Alla fegn dalla radunanza èn nias undradas tot las persungas tgi sortan cun la fegn digl 2025 da lour uffezis communals – vot deir dalla suprastanza, digl parlamaint, dalla cumischung da gestiun e digl cunsegl da scola. Menziunos seian cò Thomas Parpan, el tg’è sto set onns commember dalla suprastanza e vicepresident ed avant passa diesch onns commember digl parlamaint e Beat Fausch, tg’è sto quatter onns commember dall’executiva da cumegn e seis onns commember dalla cumischung da gestiun.