Investir in punts tanter las generaziuns

Las votantas ed ils votants da Scuol chi d’eiran preschaints in lündeschdi saira a la radunanza cumünala a Scuol han deliberà il preventiv 2026 chi prevezza pro sortidas da 62,8 milliuns francs ün s-chavd da 4,2 milliuns francs. Quai sun 1,5 milliuns damain co i’l preventiv 2025, adonta cha singulas partiziuns chaschunan bainquant daplü cuosts. Sco cha’l capo cumünal da Scuol, Aita Zanetti, ha infuormà in radunanza, chaschuna impustüt la revisiun da la ledscha da scoula ün augmaint considerabel da las expensas. Ella ha eir orientà, cha’ls cuosts da sandà previs, sajan allegraivlamaing plü bass co’l preventiv 2025 ed as muaintan i’l rom dal quint 2024.

Augmantar l’imposta fundiaria?

Sco masüra per amegldrar la situaziun finanziala esa, tenor il capo cumünal da Scuol, eir da valütar la part da las entradas. Cha cun augmantar la taxa a favur da la comunità haja la radunanza cumünala dal gün passà fat ün prüm pass. In vista a las grondas investiziuns necessarias dals prossems ons, ha la suprastanza cumünala proponü a la cumünanza d’urna d’augmantar l’imposta fundiaria dad 1,5 sün 2 ‰. Quista proposta ha pisserà per discussiuns animadas illa radunanza cumünala da lündeschdi passà. Ün votant ha fat la proposta da dozar l’imposta fundiaria be sün 1,75 ‰  e da dozar eir il pè d’impostas sün 105 %. Cha cun quista varianta pajess tuot la populaziun daplü e na be ils possessurs da stabilimaints. Ün oter votant ha pretais, cha la suprastanza elegia üna cumischiun chi analisescha la gestiun e la situaziun finanziala dal cumün da Scuol.

Refüsar l’augmaint da l’imposta fundiaria

Finalmaing han las votantas ed ils votants preschaints decis cun 50 cunter 41 vuschs cun scrutin da nu vulair augmantar l’imposta fundiaria dal cumün da Scuol. Quista decisiun es, s’inclegia, be statta relevanta sco proposta a man da la votumaziun a l’urna. Scha la dumonda d’augmantar l’imposta fundiaria vain insomma amo in votumaziun a l’urna – cun üna racumandaziun negativa da la radunanza cumünala – sto la suprastanza cumünala decider.

Fingià gnü decis esa a reguard il pè d’impostas: La proposta da dozar il pè d’impostas sün 105 % es gnüda sbüttada clermaing. Il pè d’impostas resta uschea sün 100 % da l’imposta chantunala. La taxa da pumpiers – voul dir l’import cha persunas chi nu fan servezzan da pumpiers han da pajar – es gnüda dozada da 300 sün 500 francs l’on.

Investiziuns nettas dad 8,7 milliuns

Las votantas ed ils votants da Scuol han acceptà eir il preventiv d’investiziuns 2026 chi prevezza investiziuns nettas dad 8,7 milliuns francs. Sco cha Aita Zanetti ha orientà, haja la suprastanza cumünala miss prioritats, etappà e suspais progets sün plü tard.

Differents credits d’investiziun sun gnüts concess separadamaing. Per exaimpel ün credit brüt da 2,9 milliuns francs per la fabrica d’ün stabilimaint per la chüra d’uffants. «Cul fabricat da la canorta in vicinanza da la Chasa Puntota pussibiltaina da far eir punts tanter las generaziuns, alch chi va adüna daplü a perder», ha dit il capo cumünal da Scuol in seis pled introductiv.

Ulteriurs credits sun gnüts approvats, per exaimpel per la Via da Tarasp inclus il marchapè lung la via chantunala (credit brüt dad 1,45 milliuns francs), pel rimplazzamaint da la turbina e la manisaziun da l’Ouvra electrica Charal (credit brüt da 430 000 francs), per la chamonna da passlung a Ftan (credit brüt da 350 000 francs), per iglüminaziun publica a Sent (credit brüt da 350 000 francs), per la progettaziun da la sarinera nouva a Scuol (credit brüt da 300 000 francs) o per la chamonna forestala in Uina (credit brüt da 200 000 francs). Implü sun gnüts approvats duos credits da minchün 300 000 francs per ün mür da protecziun cunter auazuns pro’l Camping Sur En e per dozar la Via da Panas-ch. Cha quists duos progets nun hajan da chefar be cun strasoras, dimpersè eir culla revitalisaziun da l’ogna da Panas-ch, esa gnü dit in radunanza cumünala.

La dumonda per ün credit per ün nouv trassè da la loipa da passlung pro’l lai d’egualisaziun da la Ouvras Electricas Engiadina es gnüda spostada per far ulteriurs sclerimaints. Ün credit supplementar da 190 000 francs es gnü approvà per la fermativa dal trafic public a Ftan. Fingià dal 2024 vaiva la radunanza cumünala da preventiv approvà ün credit da 250 000 per quist intent. Tenor la stima da cuosts actuala sto il cumün da Scuol calcular cuosts totals da 440 000 francs per realisar la fermativa da l’auto da posta a Ftan tenor bsögns da persunas cun impedimaints.

Sco ultima tractanda ha la radunanza cumünala acceptà la cunvegna da prestaziun culla Regiun Engiadina Bassa Val Müstair a reguard la gestiun da l’uffizi dal cudesch fundiari 2026 fin 2030.