Lectura rumantscha

La cura per il Center da sanadad

Vai er a tai sco a mai? – Plaunet hai jau pers la survista cun tut ils ospitals regiunals en il Grischun ch’han ina crisa: Samedan, Glion, Tusaun … – E cler, er il Center da sanadad a Savognin ha gì da surmuntar plirs mais turbulents. Per garantir las pajas dal persunal ha perfin la vischnanca stuì dar ina u l’autra sprizza finanziala. Ma ussa paress ina nova cura da far remedura: Igl è per uschè dir ina dosa omeopatica regulara or da la cassa communala en la dimensiun dad in mez milliun per onn.

Da vender a Glion: ina claustra

T’imaginescha che ti surfas forsa il schaner 2026 sin ina pagina d’immobiglias che venda chasas ed abitaziuns. E tuttenina fruntas ti sin in coloss d’in edifizi alv sin ina spunda sulegliva amez la Surselva. Bain pussaivel ch’i sa tracta lura da la Claustra da Glion, ch’è oz il grond dachasa da las soras dominicanas. Ma quel dachasa è definitivamain memia grond per la cuminanza che vegn adina pli pitschna. Vender è perquai in’opziun seriusa che daventa propi seriusa a partir da schaner 2026.

«Vin, sulagl e tü»

Has legì quest titel sura? – I tuna bunamain sco ina decleraziun d’amur a tai: «Vin, sulagl e tü». Quai è dentant mo in da numerus versets e pledins rumantschs che Tanja Wüthrich da Puntraschigna lascha cusir sin sia collecziun da chapels. Quai fa la designra da hobi dentant sper sia lavur tar San Murezzan Turissem. E tuttina ha ella gia vendì var 500 exemplars da chapels che portan en il mintgadi slogans sco «pachific» ubain «ün di da schnuz».