L’uniun Cultura Rumantscha en la Bassa fa vinavant

Ils 11 da november 2025 ha la CRB, l’Uniun Cultura Rumantscha en la Bassa, gì ina radunanza extraordinaria. La chaschun per questa reuniun è stada per l’ina da festivar ils trais onns d’existenza da l’uniun. Durant ses emprims trais onns ha la CRB organisà cun success inqual occurrenza, surtut concerts. Tranter auter ha l’uniun organisà ina sairada musicala dad auta qualitad cun trais furmaziuns rumantschas a Faveras/Pfäfers en la baselgia claustrala – cun il Chor viril Surses, ils Fränzlis da Tschlin ed il chor d’uffants Stimmwerkbande.

Ma lura è stà surtut l’emprim «Festivalet» da questa stad in grond project da la CRB. Quel inscunter cun concerts, prelecziuns e films ha l’uniun organisà – cun in comité ad hoc – amez la citad da Turitg, puspè cun l’intenziun dad unir Rumantschas e Rumantschs en la Bassa e da render visibel la lingua minoritara en la diaspora. 

La CRB vul cuntinuar cun sia activitad

Malgrà las sfidas enconuschentas da chattar raps sco era voluntaris che gidan, han las commembras ed ils commembers da la CRB decidì unanimamain l’entschatta november da cuntinuar cun lur activitad. Quai ha il president Corsin Derungs scrit en in messadi a la FMR, ed el ha gia lantschà la proxim’idea: «Nus da la CRB avain decis da tschertgar partenaris rumantschs en la diaspora ch’avessan interess dad organisar in di da famiglias e da cultura ensemen cun nus.» L’uniun locala fiss responsabla per las localitads, la gastronomia e l’infrastructura. La CRB surpigliass per la paja l’organisaziun dal program e da la finanziaziun, uschia Corsin Derungs. Che uniuns interessadas sajan ussa pia envidadas da s’annunziar direct tar il president da la CRB per sviluppar ideas, lascha savair il president da la CRB.