Scuvrir Félix Vallotton

Avant che l’onn 2025 giaja a fin èsi temp da scuvrir Félix Vallotton. Avais vus forsa anc mai udì quest num? Da principi è el sin sil medem stgalim sco Augusto Giacometti, Giovanni Giacometti, Paul Klee, Ferdinand Hodler e Cuno Amiet. Félix Vallotton è stà pictur-artist e mort avant 100 onns. Quater museums d’art da la Svizra èn sa mess ensemen ed han declarà l’onn 2025 sco «Année Valloton». A Losanna, Vevey, Winterthur ed Ascona han ins pudì scuvrir l’artist che è er sta graficher, illustratur ed autur.

Sias ovras sa chattan en tut las chasas d’art impurtantas dal mund. Tranter auter il Musée d’Orsay a Paris. Félix Vallotton è naschì 1865 a Losanna, sia famiglia derivava da Vallorbe en il nord dal chantun Vad. Cun 16 onns è Félix Vallotton ì a Paris nua ch’el ha frequentà la scola d’art ed avrì ses atelier. Ils 29 da december 1925, in di suenter ses 60avel di da naschientscha, è el mort a Neuilly dasper Paris en consequenza d’ina operaziun da rutina che n’era betg grategiada.

Sch’ins vul chapir l’art modern ston ins scuvrir Vallotton. El tutga tar las figuras pli impurtantas da la pictura moderna. In sujet che è tipic per el èn las levadas e las rendidas da sulegl. Cuntradas, purtrets, acts da dunnas, entagls en lain èn stadas ses sujets preferids. Las colurs vivas, scenas da la natira, entagls en lain e bler auter pon ins admirar en la pli gronda exposiziun da Vallotton ch’igl ha dà enfin quest onn. Il «Musée Cantonal des Beaux-arts a Losanna posseda la pli gronda collecziun dad ovras da Félix Vallotton. L’exposiziun speziala cun pli che 200 ovras da collecziuns publicas e privatas ha cumenzà ils 24 d’october 2025 e dura enfin ils 15 da favrer 2026. Jau vom en mintga cass a Losanna.