Calzers oranschs sco segn d’acziun encunter violenza

«25 dunnas ein vegnidas assassinadas entochen ussa uonn en Svizra da lur consorts ni partenaris», di la menadra da Giuventetgna Cadi, Gabriela Cabalzar. En siu plaid da beinvegni la mesjamna sera cun occasiun dalla presentaziun dalla vitrina cun lavurs da giuvnas e giuvens ella Casa communala a Mustér ha ella puntuau: «Cun nossa lavur e presentaziun lein nus gidar a rumper quei tabu. Nus lein intimar ina e scadina, in e scadin da sedefender e tschercar agid.»

La Giuventetgna Cadi ei separticipada als Dis d’acziun encunter la violenza a casa dil Post da coordinaziun violenza a casa dil cantun Grischun. Dils 25 da november entochen ils 10 da december 2025 vegn empruau da sensibilisar la glieud per quella problematica. Aschi ditg ei era la vitrina el plaunterren dalla Casa communala a Mustér aviarta per quei tema. Il giuven Miguel Demont ha embelliu musicalmein la vernissascha.

Calzers oranschs ed informaziuns

25 giuvnas e giuvens pli u meins da tuttas tschun vischnauncas sisum la Surselva ein s’interessai quest atun pil tema violenza. «Pli ditg ch’els ein stai vidlunder e pli fetg ch’els han giu tschaffen da collaborar. Igl ei stau bi da mirar co tuts ein s’engaschai», di Gabriela Cabalzar, la menadra da Giuventetgna Cadi. Ella ha introduciu ils giuvenils ella tematica el rom d’in workshop e cun agid d’in film. En quei project ein els era vegni approfundai entras in referat dalla Polizia cantunala dil Grischun. Lu han las giuvnas ed ils giuvens luvrau concretamein vid la tematica: Dau colur oranscha a calzers e formulau fegls d’informaziun. La colur oranscha setila atras la campagna encunter violenza a casa da quels dis en Svizra sco egl exteriur. Il resultat da lur lavur ei da veser ella vitrina ella Casa communala a Mustér. Bein formada fa ella attents sil problem dalla violenza a casa e dat informaziuns co agir el cass dils cass.

In trest tema

Che la violenza – seigi a casa ni el spazi public – ei in tema tier la giuventetgna han Lea Carigiet, Matilde Oliveira e Rihanna Manetsch detg la sera duront igl apero preparaus dalla giuventetgna: «Da quei tschintschein nus era denter nus e per quei motiv essan nus sedecididas da separticipar al project. Igl ei stau fetg interessant, damai ch’igl ei in impurtont tema.»

S’exprimida alla vernissascha ei era la geraua Jris Lombris-Manetsch, responsabla enteifer la suprastonza communala da Mustér per sanadad, fatgs da scola, cultura e sport: «Violenza a casa ei in trest tema. Bia violenza ei buca veseivla e biars pertuccai sedostan buc.»

Presents alla vernissascha ei era gerau Diego Deplazes da Sumvitg/Rabius staus, responsabels leu denter auter per sanadad e fatgs socials. En sia funcziun professiunala sco meinafatschenta dalla Crusch cotschna svizra dil Grischun eis el meins involvius ella tematica violenza a casa. Tonaton di el: «Sin fundament da nies project Ponte cun voluntaris scolai dein nus cussegls a famiglias e persunas en grevas situaziuns.» Situaziuns extraordinarias san medemamein menar a tensiuns. La lavur da Giuvnetetgna Cadi ella vitrina dalla Casa communala a Mustér ei da veser entochen ils 10 da december 2025.