«Ei drova in flad profund»

«Patratga inaga tgei revolta ch’ei havess dau, sche la la claustra da Mustér havess annunziau da vender siu edifeci.» Quei gi Mariano Tschuor che fa part al cussegl da fundaziun dalla claustra da Glion. Quei gremi ha gest annunziau da vuler vender la claustra da Glion.

Ei dat denton aunc autras differenzas denter la cuminonza benedictina da Mustèr e quella dallas soras dominicanas da Glion. Ferton che la Regiun Surselva ha susteniu finanzialmein duront in pèr onns la scola gimnasiala dalla claustra da Mustér, ha ella priu naven il center da scolaziun dalla claustra da Glion senza grondas discussiuns. Sin in resun ni in protest public viers quella mesira da disloccar quella scola alla staziun da Glion han ins spitgau adumbatten.

Biaras claustras cun semegliont destin

Mariano Tschuor vesa in clar motiv pertgei ch’ei vegn fatg persenn a moda differenta dallas duas cuminonzas claustralas en Surselva. «Inaga ha quei segiramein da far cun um e dunna.» La lavur sociala che las soras dominicanas han prestau duront decennis gauda buca la medema reputaziun sco la lavur dils frars benedictins a Mustér. Mariano Tschuor ei pertscharts che la claustra da Mustér posseda ina bia pli liunga tradiziun historica che la claustra da Glion fundada el 19avel tschentaner: «Secapescha che quella tradiziun historica dat ina certa peisa e valur alla cuminonza benedictina da Mustér.»

El fa attent che la claustra da Glion seigi per bia buca la suletta cuminonza che stoppi urgentamein sefatschentar cun siu avegnir: «Ina gronda part dallas claustras ella Europa Centrala ein periclitadas e biars edifecis claustrals ein gia vegni vendi ni han anflau in niev intent.»

Object attractiv

Che la claustra da Glion anfla in cumprader ei Gieri Darms che meina ina interpresa dad immobilias a Glion perschuadius: «Quei ei in attractiv object che sesanfla en in bellezia liug!» Gieri Darms ei era cunscients ch’ils interessents ston prender enta maun ina pulita summa da daners, buca mo per cumprar igl edifeci, mobein era per dar ad el lu in niev intent. Da tgei summa ch’ei setracta, vul e sa Gieri Darms buca specular: «Per quei eis ei aunc bia memia baul.»

Cons daners ch’el ha dau ora per cumprar ina claustra, respectiv grad duas, quei vul Bruno Amberg dalla interpresa dad immobilias Transterra SA era buca tradir. Gia igl onn 2019 ha el cumprau la claustra da Wikon el cantun Lucerna e medemamein la claustra da Melchtal el cantun Sursilvania. Domaduas claustras devan suttetg ad ina cuminonza da soras benedictinas. Oz valetescha el sia cumpra empau sco «Spinnerei». S’enriclaus dalla investiziun ei Bruno Amberg tuttavia buc, sco el ha tradiu alla FMR. Quei malgrad ch’ils dus edifecis han aunc buca retschiert ina nova funcziun. Bruno Amberg tschontscha da «bia temps e dad in flad profund» che seigien necessaris per dar allas anteriuras claustras ina nova incarica: «Intervenziuns en in baghetg historic ein buca semplas.» Las duas cuminonzas dallas soras benedictinas a Wikon e Melchtal ein seconstituidas el 19avel tschentaner, circa dil medem temps sco la cuminonza domincana da Glion. La claustra da Glion ei buca mo in bienton pli gronda che las duas claustras ella Svizra Centrala. Ella ei bein pèr vegnida baghegiada els onns 60 dil tschentaner vargau, stat denton era sut protecziun dalla Tgira da monuments.

Ei dat denton aunc diversas autras claustras en Svizra che han retschiert in niev destin. Mariano Tschuor menziuna per exempel l’anteriura claustra dad Altdorf ch’ei oz in center cultural. Buca mo quei, pertgei era la sedia svizra dalla Orascom Development International SA da Samih Sawiris ei leu dacasa.

Negina surpresa

Per la vischnaunca dad Ilanz/Glion ei l’annunzia dalla claustra da vuler vender igl edifeci buc ina surpresa. Il president communal, Marcus Beer gi che la vischnaunca seigi en stretg contact cun la claustra ed era involvada ellas discussiuns davart il futur. Per midar il nez digl edifeci claustral sur il marcau da Glion drova ei ina midada dalla zona. «La damonda per midar la zona ei arrivada tier nus», tradescha Marcus Beer. El fa attent che la vischnaunca vegni ad instradar ina revisiun parziala dalla planisaziun locala che drovi in cert temps. «Ei vegn buc a dar ina zona da habitar ordinaria.» Ed ina caussa sclauda il president communal dad Ilanz/Glion da retschiert. «La vischnaunca cumpra segir buc la claustra.»