In lamento che ha purtà fritg

La PPS ha tutgà amez la noda. Il Grischun ha ditg GEA a sia iniziativa cunter paracrudaders d’aur, malgrà che tut las autras partidas han avertì. La cuntraproposta – en sasez raschunaivla – è ida rasantamain da la glatscha giu.

Ma pertge è l’iniziativa ida uschè sin il viv ed ha chattà ina uschè auta acceptanza tar la populaziun? Trais explicaziuns pussaivlas:

Sco emprim: «Spargnar, spargnar, spargnar» – quest refrain politic vegn chantà dapi onns sin champ federal, chantunal e communal. Mesiras da spargn na tutgan per ordinari betg ils bainstants, mabain savens quels che n’han nagut danvanz. Pertge lura betg spargnar gist tar las politicras ed ils politichers sezs, sch’els predegian quai d’in cuntin? Quai pon avair sa dumandà blers e bleras cun emplenir ora il cedel da votar. Il verdict chantunal da questa fin d’emna pon ins chapir tranter auter sco resposta sin il lamento sempitern ch’i sto vegnir spargnà.

La segunda explicaziun: «Quels si là» è in’expressiun da disfidanza envers tut quels e quellas che prendan en la politica las hottas enta maun. Questa expressiun datti gia daditg. Ma ils ultims onns ha la disfidanza visavi l’uschenumnà establishment survegnì pli grond andit. Tgirada vegn questa disfidanza – saja quai uss en Svizra u en l’exteriur – cunzunt da las partidas da la dretga. La PPS profitescha dal malesser envers «quels si là» – in malesser ch’ella ha sezza nutrì. Che la partida tutga atgnamain sezza tar l’establishment e fa per il solit ina politica che sustegna gist quels che han gia detg avunda, gliez cuschenta ella cun grond dun.

La terza explicaziun: In chantun suenter l’auter ha abolì las pensiuns per vita duranta. Er en il Grischun è gliez vegnì tematisà. Ma ni il Cussegl grond ni la Regenza han reagì ad uras ed instradà ina midada raschunaivla sco quai che la cuntraproposta fiss stada. Cun targlinar uschè ditg, ha ussa l’iniziativa cunter paracrudaders d’aur fatg strada.

Cun la victoria da questa fin d’emna prenda la PPS chatsch per il cumbat electoral da l’onn proxim. Igl è ina victoria cun consequenzas diras per las persunas en la Regenza actuala. In cusseglier guvernativ sco Marcus Caduff u ina cussegliera guvernativa sco Carmelia Maissen han a sias uras candidà per l’uffizi cun tut autras premissas. Cun il verdict da questa fin d’emna èn questas premissas sa midadas cumplettamain ed els èn sfurzads dad acceptar quai senza far ni hau ni mau.