Cumiau e cuntinuaziun
Venderdis sera ei la secziun Péz Terri dil Club alpin svizzer s’entupada a Glion alla radunonza generala. El center ein duas tractandas stadas: Inagada la midada dil presidi dad Arno Arpagaus tier René Cavegn. Lu ha gl’architect Gion A. Caminada presentau il project niev dalla camona da Maighels.
Dapi prest diesch onns s’entaupan Terrianas e Terrians ina gada ad onn a Glion. Igl ei la sedia dalla secziun ch’in triep alpinists sursilvans han fundau gl’onn 1898. 127 onns pli tard eis ei ina dallas 110 secziuns dil Club alpin svizzer. Cun 2128 commembers eis ei ina activa che porscha mintg’onn in vast program da turas d’unviern e da stad. Las duas camonas dalla secziun, quella da Terri che ha uonn 100 onns, e quella da Maighels, ein petgas pil prosperar. A caschun dalla radunonza generala han ins presents saviu prender notizia, e las cefras dallas pernottaziuns cumprovan quei.
Stagnaziun da commembers
En siu onn da giubileum ei la camona da Terri vegnida restructurada e renovada. La sempla camona da crap digl onn 1925 ei ussa in “hotel” cun 94 letgs ed infrastructura moderna. Tgi che vul contonscher ella ei denton aunc adina sfurzaus dad ir a pei. Intent dalla secziun eis ei da parter il plascher dils cuolms e dalla natira e da tgirar la cumpignia. Suenter onns da carschen ha la secziun Péz Terri registrau l’emprema gada ina bilanza negativa en connex cul diember da commember. Enviers 82 entradas ha ei dau 116 extradas. Quei ha denton buca influenzau il resultat finanzial. Selina Schmed, la cassiera e substituta dil president, ha saviu presentar pigl onn 2024/25 in gudogn da 127’397 francs. La gronda cumpart da quella summa, numnadamein 93’000 francs, deriva dil recav dallas duas camonas.
Sco quei ch’il schef da turas Meinrad Arpagaus ha getg, cuntegn il program 2025/26 108 turas e cuors, da quei 56 turas da skis, 16 cuors da scolaziun, 18 turas da stad aultalpinas, da reiver e diversas autras. La purschida da G+S includa 30 turas per affons e giuvenils.
Alla radunonza generala da venderdis ell’aula dalla casa da scola han biebein 140 Terrianas e Terrians priu part. La radunonza ha priu cumiau dil president Arno Arpagaus. Sco siu successur ha ella elegiu René Cavegn, da Breil a Glion (mira intervesta). Era priu cumiau ha ella da Toni e Doris Trummer-Tomaschett. Ils guardians dalla camona da Terri han calau la fin dalla stagiun 2024/25 suenter 30 onns. Lur successurs ein Jochen Schirmann e Verena Kuhle. La camona da Maighels meina vinavon il pèr Nora Honegger e Mauro Loretz. Pertuccont gl’avegnir dalla secziun, las prioritads ed il svilup dils commembers ha la FMR discurriu cul president niev René Cavegn.
Trumpada e nova partenza
Ina dallas tractandas dalla radunonza generala ei stada quella d’in project niev per la camona da Maighels. Dapi varga in decenni s’occupa la secziun dalla renovaziun da quella. Gl’onn 2024/25 ha ella registrau 7157 pernottaziuns, dapi onns s’auda ella tier las “top ten” dallas camonas dil CAS. Ina renovaziun fuss denton urgenta. Gia avon siat onns, il november 2018, ha la radunonza generala approbau in credit da baghegiar da 2,4 milliuns francs. Tut era semtgau e la camona dueva restar serrada gl’onn 2020. Vegniu eis ei auter – denton buca pervia da Corona. Gl’Uffeci federal digl ambient ha numnadamein anflau il “cavegl ella suppa”. Suenter che la via al plazzal era sanada e tuttas lubientschas cantunalas regladas, ei gl’uffeci federal s’opponius. La camona sesanfli en ina cuntrada da paliu e las prescripziuns pil schurmetg dallas palius lubeschien buca ils plans, han ins argumentau.
Venderdis ha il president partent Arno Arpagaus saviu annunziar ina debloccada. Sco quei ch’el ha declarau alla radunonza ein las vestas bunas ch’in project niev gartegia. Gion A. Caminada ha presentau l’idea leutier. Gl’architect da Vrin ha planisau e realisau gia duas gadas la renovaziun dalla camona da Terri. A Maighels ha el retschiert l’incumbensa da planisar ina restructuraziun en ina cuntrada sensibla. La camona existenta ha 83 letgs, la nova 62. Dalla redimensiun profitescha la qualitad, il diember reduciu da letgs lubescha da planisar autruisa e risguarda las disposiziuns legalas. Encunter il cuolm duei la camona da Maighels survegnir ina caverna sutterrana cun in diameter da circa nov meters. La camona che Gion A. Caminada planisescha, duei s’integrar optimalmein ella cuntrada. Las fatschadas da crap dattan caracter alla casa, finiastras e lucarnas laian entrar la glisch e valeteschan gl’object turistic. “Per quei project havein nus retschiert ferms signals empermettonts da Cuera”, ha il president partent Arno Arpagaus tradiu alla radunonza generala. (fmr/abc)
Gust da leger dapli?