Daplü vacanzas pel persunal cumünal

Samignun introdüa üna nouva ledscha da persunal pel cumün. Las votantas ed ils votants han dit da SCHI clermaing a la nouva ledscha – cun 76,4 %. La regulaziun veglia d’eira in vigur daspö l’on 1998 e nun es mai gnüda adattada. Culla nouva ledscha da persunal voul il cumün s-chaffir tanter oter daplü transparenza ed adattar las disposiziuns a las nouvas circunstanzas. Tanter oter varan collavuraturas e collavuraturs cumünals ün’eivna daplü vacanzas, nempe 25 dis. Ed i darà ün sistem da paja tenor s-chalins da funcziun e classas da paja.

In ün seguond proget da votaziun ha il suveran approvà üna nouva ledscha da pumpiers. Eir quella vaiva l’intenziun d’actualisar las regulaziuns dad uossa. Il resultat da votaziun: 135 SCHI cunter 63 NA.

Sco terz proget han votantas e votants da Samignun eir approvà – cun 165 SCHI cunter 31 NA – üna revisiun da la ledscha da scoula. Quellas adattaziuns ha il cumün fat in consequenza da las müdadas cha’l Chantun ha fat illa ledscha da scoula. Tanter oter vain uossa la scoulina declerada sco obligatorica.