En stiva

Fiasta el vitg. En halla polivalenta. Adina puspei. Mintga pèr meins. Adina lu, cu ins ha tertgau ch’ins hagi finalmein ina fin d’jamna libra.

Nus enconuschin aschi bein quella localitad sco nies sac dallas caultschas. Nus savein tgei porta che va vess da serrar, tgei cazzola che trembla e nua che la scuetta e la palutta ein.

Sutgas emplunein nus cun egls serrai. Meisas mettein nus ensemen dus a dus. Ed adina admonescha enzatgi: «Adatg dalla detta!»

Zacu vegnan las dunnas. Cun tuortas. Fatg sez – fai quen. Grondas, rodundas, prigulusas. Pertgei la vera damonda ei: «Tgi taglia ussa quellas?» Negina vul riscar da tagliar falliu. Memia grond, memia pign, memia uiersch. Mett’avon! Perquei miu tip: Tagliei a casa quei uorden.

Tier ils umens ei la damonda in’autra: La gervosa. Memia freida? Memia caulda? Ins sa buca propi. En mintga cass ein tuts malcuntents. Ils ins patriotics: Calanda ni nuot. Ils auters selegran dalla «vischina dil sid», signora Moretti (mo era ella vegn si da Cuera).

E lu tila ei gie savens en quellas hallas. Arver las finiastras? Ni schar ellas serradas? In tgau – in meini. Plirs tgaus – plirs meinis. Il meglier ei da buca seser all’entrada e basta. 

Adina ils medems vegnan sco emprem. Adina ils medems van sco emprem. Ed adina ils medems che manegian tuttenina: «Schia, uss eis ei aber uras!» E lu aunc la truppa ch’ei quasi adina sco davosa en halla cun in migiel vin avon il nas (jeu s’audel tier quella). 

Cuort avon la fin croda la damonda: «Tgi pren a casa ils schigentamauns e lava els?» Enzatgi surpren naturalmein. Pil pli er adina la medema persuna. 

E buca d’emblidar: ils rests. Enzatgei ei adina danvonz suenter ina fiasta: ligiongias, suppa, paun, ketchup (pil pli ina butteglia XXL), pettas, suc d’oranscha (quei che negin vul veramein) e sandwichs. Tut vegn repartiu.

Aschia finescha la sera. Ins siara igl esch, pren cumiau da Pieder e Paul e selegra d’ir en treglia. Enten ir a casa observel il tschiel stelliu e tratgel: Ah gie – nossa buna halla – ina gronda, secunda stiva. 

Patricia Tschuor-Marques viva a Rueun. Magari passenta ella dapli uras en halla polivalenta che a casa.