La natira tras igl objectiv

«A mi fa ei grond plascher d’astgar beneventar in artist indigen cheu ella Casa da cultura Ringel», ha Hans Peter Capatt, il president dall’uniun Casa da cultura Ringel getg en siu beinvegni. Johann Clopath muossi detagls dalla natira digl intschess da Trin che biaras e biars da Trin vesien buca. El enconuschi la natira dalla vischnaunca da Trin sco negin auter. Ils maletgs stai exponi per la publicitad a Trin naven da venderdis entochen ier dumengia sera han tetels sco «Muostga blaua dils bindels lads», «Muostga-scorpiun», «Viaspra tudestga engola la preda ord ina teila falien» ni «Glatsch». Numerusas visitadras e visitaders han priu la caschun da far in viadi e veser la bellezia zuppada dil contuorn da Trin.

In motiv cloma in proxim

Il fotograf Johann Clopath ha declarau cugl exempel d’in maletg cun in motiv da glatsch co el tscherca, anfla ed arcunescha elements ni detagls dalla natira cun sia camera: «Jeu fetschel mellis fotografias sur in cert temps e duvrar saiel jeu il bia ina.» Cun ir a spass cul tgaun la damaun hagi el scuviert il glatsch giun plaun che seigi in motiv excellent per cattar detagls. «Aschi gleiti ch’ins catta detagls interessants dat quei sc’in regl d’encurir daplirs e novs detagls. Igl ei empau sco il catschadur che setta in taur da dudisch e vul la proxima gada sittar in da quitordisch», ha igl artist getg.

Igl abstract concret

Johann Clopath ha getg en discuors culla FMR ch’el hagi percurschiu duront ina autra exposiziun ch’il publicum vesi en mintga maletg abstract dad el enzatgei concret, seigi quei in spért, ina sliusa, in tren ni animals che senodan ell’aua. Quei process da veser sil glatsch e cattar ils maletgs ni motivs seigi in process abstract concret. E da quei process daventi el perdetga la damaun cura ch’el sefermi sper ils puozs schelai. Il glatsch cun motivs vesi ins mo in mument la damaun. Aschi gleiti ch’il sulegl cuchegi neuagiu liui il glatsch ed ils maletgs svaneschien.

La natira sco tema

Glatsch, brentina, aua, insects ein stai ils temas dallas fotografias che la Casa da cultura Ringel ha mussau da Johann Clopath. El fotografescha bugen ella natira. Entschiet hagi el cun fotografar insects che sgolien. «Ina sfida per mei ei per exempel stau da fotografar in aviul che sgola culla perspectiva da davos. Leu ves’ins las combas ed il pollen ch’el porta. Era ina sfida ei stau da fotografar in aviul che sgola encunter ad ins e setschenta sin ina flura. Entochen ch’igl aviul vegn sin quella flura ha ei num spitgar ed haver pazienzia», ha Johann Clopath getg. Il pli fascinont dil fotografar insects seigi la varietad dallas colurs.

Faliens sco motivs

Johann Clopath ha entschiet a fotografar gia avon plirs decennis sco redactur dalla Casa Paterna/La Punt. «Jeu fotografeschel bugen situaziuns, per exempel la situaziun d’in falien che ha pigliau ina muostga ni in falien che va cun ses pigns si dies. Inagada haiel jeu giu il cletg da survegnir avon la camera in falien che fa ina teila.» Zatgei ch’el fotografassi bugen egl avegnir seigien utschals en moviment, ha il fotograf detg ch’ei carschius si a Lon silla Muntogna da Schons ed ha luvrau sco scolast e pli tard duront biars onns sco redactur e menader dall’informaziun tier RTR.

Plascher d’exponer

«Igl ei per mintga artist in plascher da saver exponer ses products e perquei sun jeu aviarts per novas exposiziuns», ha il fotograf da Trin-Mulin getg. Johann Clopath fotografescha per mussar vinavon e buca per conservar las fotografias el computer. Sias exposiziuns ella Casa da cultura Ringel a Trin sco era ella Casa d’Angel a Lumbrein all’entschatta digl onn ein vegnidas visitadas d’in grond publicum. L’exposiziun ei ida alla fin ier dumengia sera.