Miss oura il tapet pel «Paradis»

Las votantas ed ils votants da Scuol han approvà – cun 838 cunter 323 vuschs – la revisiun parziala da la zona da l’hotel «Paradis». Uschea po l’hotel da tradiziun «Paradis» illa fracziun da Ftan gnir sbodà e rumi dal tuottafat. In quel lö dessa dar in avegnir ün terz quartier illa fracziun da Ftan – sper Ftan Pitschen e Ftan Grond. Sün quel areal da l’anteriur hotel es planisada üna sur­fabricaziun cun ot chasas d’ün resort. L’inter cumplex cumpigliarà ün hotel cun wellness, ün restorant, trais chasas cun abitaziuns commercialisadas, üna chasa per velos e bikes, üna chasa pel persunal ed üna garascha suotterrana. In tuot vessa da dar 190 lets in abitaziuns e stanzas d’hotel, e l’inter proget cuostarà tanter 40 – 60 milliuns francs. Daspö 30 ons es l’areal in possess da la famiglia Horst Rahe, la quala voul uossa realisar il resort.