Tedlei, o fideivels cun 90 stans da fiera

«Il tema dalla fiera d’advent ei adina daus», di Gaby Blum, la menadra dalla fiera d’advent a Glion. «Leusuenter ein era tut ils stans decorai cun sujets d’advent e da Nadal.» Biaras vendidras e biars vendiders da fiera vegnan gia dapi biars onns alla fiera d’advent egl emprem marcau spel Rein. Gaby Blum dalla Stiva Creativa a Glion separticipescha gia dapi 17 onns sco participonta e sco menadra dalla fiera d’advent. «Jeu hai aunc adina grond plascher d’ir cun miu agen stan alla fiera d’advent ed jeu sun era suenter 17 onns aunc adina fetg motivada d’organisar la fiera ensemen cun mia squadra», declara ella e cumpletescha: «Jeu hai in fetg bien team culla gruppa da luvrers communals che fa ina gronda lavur e cun mia squadra dall’uniun da commerci che sustegn dapertut nua ch’ei drova il di da fiera.»

20 novs expositurs

«Uonn havein nus 20 novas exposituras ni expositurs», di Gaby Blum. Quei motiveschi ella. Cun 90 stans seigi l’organisaziun fetg cuntenta. Ei havessi denton aunc plaz per treis entochen quater ulteriuras vendidras ni vendiders. Gaby Blum ha era la davosa sonda giu d’haver quitau da si’atgna clientella sil stan da sia Stiva Creativa alla Via Centrala. Dasperas ha ella visitau ils auters stans da fiera per mirar che tut seigi en uorden. «Duront quellas visetas sils stans sedattan fetg biars buns discuors», di la menadra dalla fiera.

Guder ha prioritad

L’oriunda architecta Gaby Blum accentuescha che mintga vendidra ni vendider da fiera vegni en emprema lingia a fiera per recaltgar in gudogn cun sia purschida. E malgrad quei seigi la fiera d’advent sper il liug da fatschenta era in liug da divertiment. La menadra dalla fiera numna la gruppa da tibas da Glion e contuorn ch’ei era seproducida el decuors dalla sonda da fiera. Plinavon han ins udiu in chor ad hoc cun num «Städtlichor» ch’ei sepresentaus uonn per l’emprema gada alla fiera d’advent. Ed en baselgia catolica ha giu liug in’occurrenza da cant aviert per ina e scadin.

Carstgauns fan la fiera

Gaby Blum ei cun sia fatschenta ina da quellas indigenas da Glion che separticipescha dalla fiera d’advent. Duront igl entir onn pren ella part da pliras fieras en Svizra. «Independentamein da mia funcziun sco menadra da fiera stoi jeu dir che la fiera d’advent a Glion ei per mei persunalmein ina dallas bialas ch’jeu enconuschel.» Quei che rendi interessanta la fiera d’advent a Glion seigien era las instituziuns e las persunas privatas che porschien lur products. «Ei dat dunnas ed umens che vegnan alla fiera d’advent cun lur products sco per exempel rauba da launa ch’els han produciu duront igl onn. Era quei ei super.»

Las visitadras ed ils visitaders che la FMR ha entupau la sonda suentermiezdi sin via numnan sper la purschida sils stans era la bial’atmosfera cullas glischs ed il pigniel da Nadal grond silla Plazza Cumin. L’atmosfera famigliara fetschi ch’ins sesenti bein. La menadra dalla fiera di che l’Uniun da commerci e mistregn organiseschi e prepari ils stans. El center stettien las vendidras ed ils vendiders sco era las visitadras ed ils visitaders.

Glion ha tradiziun

Che la fiera d’advent a Glion ei tschercada da vegl e giuven, da persunas singulas e famiglias han ins era saviu far persenn la sonda vargada. Malgrad ch’ei dat ad interim fieras d’advent en plirs loghens dalla Surselva attrai la fiera d’advent a Glion adina in grond publicum dall’entira regiun. La fiera hagi era liug quasi da tut aura, di Gaby Blum. «Nus havein cun excepziun digl onn dil coronavirus 2020 maina stuiu disdir ina fiera d’advent pervia dall’aura.» Sch’igl ei bi e migeivel, ei la glieud sin tura tras la fiera. E sch’igl ei freid e bletsch, lu han las bubrondas sils stans ed ils restaurants da Glion dapli sviulta.