Finiu cun leger giu

Ellas saudan pli e pli fetg alla historia dil provediment d’electricitad. Las persunas che spluntan regularmein vid igl esch-casa per leger giu il dumbrader. «En nies intschess eran aunc avon paucs onns diesch persunas engaschadas da leger giu ils dumbraders da noss biabein 9000 consuments», gi Christian Capaul che meina l’interpresa Rhiienergie che furnescha electricitad ellas vischnauncas Razen, Panaduz, Tumein, Domat e Favugn. La lescha d’energia federala pretenda ch’ils furniturs d’energia installeschien sin igl onn 2027 aschinumnai dumbraders intelligents. Smartmeters che mesiran buca mo dafertontier il diever d’electricitad, mobein che tradeschan quei consum era regularmein al consument. «Nossas clientas e noss clients ston buca pli spitgar sil quen per saver conta energia ch’els drovan.» Via in agen portal installaus sin la pagina dil furnitur d’electricitad ni via ina applicaziun sa mintga casada pli u meins direct cu e con energia ch’ella drova.

Pusseivladad da spargnar

Il dumbrader intelligent ei part dalla politica d’energia 2050 ed igl Uffeci federal d’energia quenta cun in respargn entochen 5 % dil consum d’electricitad entras igl effect d’efficienza. Il singul consument sa aschia da tgei uras ch’el drova con electricitad e sa adattar siu consum al temps nua ch’ei dat electricitad en abundonza cun in prezi pli mudest. Christian Capaul da sia vart ha certas resalvas pertuccont quei respargn. «Entochen uss ei igl interess dalla vart dils consuments fetg mudests.» El gi che spargnar 5 % digl agen consum d’electricitad hagi per il singul consument buc in fetg grond effect finanzial.

Auter sepresenta la situaziun per possessuras e possessurs dad indrezs solars che han forsa in auto electric en garascha ed ina battaria en tschaler per arcunar l’atgna producziun. «Talas persunas ein fetg interessadas da manischar l’atgna producziun ed igl agen diever d’energia», gi Christian Capaul.

Grondas investiziuns

Il meinafatschenta dalla Rhiienergie tschontscha da grondas investiziun necessarias per installar ils dumbraders intelligents. «Nus essan sin buna via e vegnin a frida cun las lavurs sin igl onn 2027.» Semegliont tuna ei tier la Repower ch’ei pil mument lundervi d’installar ils smartmeters ellas vischnauncas da Trun e Sumvitg. Tenor atgnas informaziuns ei entochen uss sulet la vischnaunca da Mustér equipada cun dumbraders intelligents egl intschess sursilvan dalla Repower. Igl Uffeci federal d’energia scriva ch’ils furniturs d’electricitad paghien ils dumbraders intelligents anticipadamein. Amortisai vegnan els indirect dallas persunas che drovan e pagan l’electricitad.

Avantatgs per las interpresas

Avantatgs porta il dumbrader intelligent denton era allas interpresas che vendan energia. Christian Capaul gi ch’ei detti certas restricziuns pertuccont duvrar las datas ch’ils dumbraders intelligents furneschien. «Tuttina savein nus pli spert e pli exact cu e nua che nossa energia vegn duvrada.» Il meinafatschenta manegia che Rhiienergie vegni egl avegnir a reponderar ed adattar sia strategia da prezi. La Repower scriva sin damonda dalla FMR da haver actualmein 25 montaders en acziun sulet per installar il dumbrader intelligent. «Gia ussa sa ina tiarza da nossa clientella mirar via nies portal conta energia ch’ella drova dafertontier.»

Repower fa attent che la lescha prescrivi da registrar il consum da mintga singul client en in tact da 15 minutas. «Grazia a nies sistem savein nus porscher egl avegnir e sin giavisch a nossa clientella ina investa directa e reala.» La Repower quenta medemamein da profitar sco interpresa sezza dils dumbraders intelligents, principalmein per planisar e manischar la reit. «Quei ei fetg impurtont cunzun en vesta che la producziun dad ovras solaras crescha ed il diember da pumpas da scaldar ed autos electrics», scriva la Repower en sia risposta.