In «capricorn» sco nov president

L’urs appenzellais stoppia ussa surdar al capricorn grischun il timun, ha ditg Andrea Caroni da l’Appenzell Dadora il glindesdi en il Cussegl dals chantuns. Il president partent ha surdà la batgetta a Stefan Engler.

Il Grischun ha fatg 44 da 45 vuschs inoltradas tar sia tscherna. Igl è in resultat excellent. Ils presidents elegids survegnan en media 42 vuschs.

Rumantsch – la vaira identitad svizra

En quatter linguas ha Stefan Engler tegnì ses pled d’inauguraziun – per rumantsch, tudestg, franzos e talian. Sia elecziun saja in’onur tant per il Grischun sco per ils Rumantschs. «Lingua sa unir», ha el ditg. «Gist linguas minoritaras stgaffeschan solidaritad, in sentiment da vischinanza, perfin sur distanzas geograficas or.» Blers en Svizra sajan loschs da la democrazia, ma spezialmain era da la plurilinguitad, ha ditg Stefan Engler: «Lingua n’è betg simplamain in med da communicaziun – ella è in’expressiun da mia identitad.»

Il scienzià da litteratura Rico Valär haja perfin ina giada descrit il rumantsch sco «il» segn caracteristic che stgaffescha l’identitad da la Svizra, ha ditg il nov president: «S’imaginai: Il rumantsch – discurrì da gnanc in mez pertschient da la populaziun – sco spievel da nossa chapientscha naziunala!»

Ils Fränzlis portan schlantsch

Per schlantsch e tempra festiva han suenter l’elecziun procurà ils Fränzlis da Tschlin. Els han sunà tant in valzer sco era tocs svelts ed agils per la «chambre de réflexion» sco ch’il Cussegl dals chantuns sa numna gugent. Sin la tribuna da visitaders ha la famiglia da Stefan Engler, ma er amis e represchentants dal Grischun observà las elecziuns.

La chombra pitschna ha en pli tschernì anc ils ulteriurs commembers dal biro: Il Bernais Werner Salzmann è daventà emprim vicepresident, la Giurassiana Mathilde Crevoisier segunda vicepresidenta.

Timunar e vusch da tagl

L’incumbensa dal president è tenor lescha da timunar las tractativas en il Cussegl dals chantuns. El decida tge che vegn mintga di sin la glista da tractandas durant ina sessiun e represchenta il cussegl vers anora. Tar paritad da vuschs – vul dir sch’i dat ina votaziun cun tuttina bleras vuschs pro e contra – decida il president cun sia vusch da tagl.

Ils presidis da las duas chombras federalas vegnan occupads mintg’onn l’emprim di da la sessiun d’enviern. En il Cussegl naziunal ha il Friburgais Pierre-André Page da la PPS prendì plaz il glindesdi sin la sutga presidiala. Katja Christ da Basilea Citad è daventada emprima vicepresidenta, Farah Rumy dal Soloturn segunda vicepresidenta.