Incaps cun ina app e la scufla – e salids da Mani Matter
Jeu mon bugen cun tren. Ti sas seser, leger, tedlar musica, cupidar – insumma: schar dar l’aura pils larischs. Mo inaga ni l’autra eis ei buc aschi sempel. Per exempel gliez di, cu jeu hai vuliu cumprar in bigliet e la app dalla Viafier federala (SBB mobile) funcziunava buc.
Tgei far? Perquei ch’jeu sun empau en retard, sedecid’jeu d’ir el tren e da cumprar leu in bigliet. Cumprar ei bien, sche negin venda in! Sur ina finiastra eis ei scret en mellen ch’ins stoppi pagar 100 francs, sch’ins hagi buc in bigliet. Jeu vegn in tec nervus, mo la app funcziunescha aunc adina buc. Negin vegn denton a far controlla. Tuttina: Ei resta in curios sentiment. Empau sco tier quels buobs pigns che han fatg ina dètga cattavegna e ston ir a casa e confessar il malfatg.
Strusch sesius el tren, stos jeu ir sin cumà. Igl ei in bien toc tochen el liug, per part sur bagascha ora, e lu stos ti ir tras il cumpartiment ed empruar da tener peisamesira – il tren geina bravamein – per buca dar dretg e seniester encunter ils passagiers. Arrivaus al liug constateschel jeu che la tualetta ei occupada. Ed uss? Spitgar ni ir ella proxima? Spitgar memia ditg sai jeu buca, perquei che la scufla vegn pli fleivla cun la vegliadetgna. Per nuot vegn ei buca detg che cun la pensiun vegni aunc enzatgei auter. Basta, jeu spetgel, schegie ch’jeu hai in crampf en ina comba (pli baul schevan nus il greufli). Per cletg stoi jeu buca spitgar memia ditg.
Anavos el plaz sedecid’jeu da leger. La finala hai jeu priu treis cudischs el sacados. Mo strusch ch’jeu hai entschiet a leger il Tschespet, aud’jeu ina passagiera che telefonescha aschi dad ault ch’jeu sai buca seconcentrar da leger. Ins sto bunamein tedlar, nolens volens. E smarvigliar. Daco raquenta ella tut quei? Caussas ch’jeu ughegiass mai da raquintar, cu tons audan ni teidlan.
Epi entscheiva in pop a bargir, e lu aud’jeu co in passaschier grescha el tgiern zatgei sco «ti pauper cuccalori, tappalori, tappagnac e tschagrun fatgs si cun pugn. Sche ti eis buc in veritabel sgnup e tup, gliez!»
Sinquei sevilan in pèr giuvens. Quella huara harra, sto quei esser, schon crass mann, stai cools, di in auter, mira quei cheu ei huara gail. Gailira!
Quei tscho ben quei tscho! A mi vegn la canzun dil cantautur Mani Matter endamen: «Wil si Hemmige hei». Empau da retenientschas bein! Mo ston ins insumma haver retenientschas? Podà ch’jeu s’audel tier la generaziun pli veglia ch’ei endisada cun in auter secuntener. Ni eis ei mo perquei ch’jeu vi ir el tren e haver miu ruaus? Tgisà? Sch’ins enquera denton il ruaus, savess ins eventualmein prender in pèr da quels gronds uregliers ch’ins vesa ora sc’in da quels aliens che vegn gest zanua ord igl univers. Ni aunc meglier: Buc ir cun tren. La finala ei in tren in mied public per transportar persunas d’in liug a l’auter. Ed jeu crei che Mani Matter mava era bugen cun tren, sch’jeu audel sia canzun: «Ir Ysebahn».
Gust da leger dapli?