«Jeu giavischel da mantener la qualitad»
Pertuccont gl’avegnir dalla secziun Péz Terri, sias prioritads e finamiras ha la FMR discurriu cul president niev René Cavegn.
René Cavegn (59) ei carschius si a Breil. El ei maridaus e bab da duas feglias carschidas. Oz habitescha el a Glion nua ch’el meina ensemen cun partenaris in biro fiduziari. En siu temps liber eis el savens sin vias, trutgs, pistas e loipas, a pei, cul velo e cun skis. Gl’onn 2019 ha el scuviert la fascinaziun da far turas da skis.
FMR: Il presidi dalla secziun cun ses varga 2000 commembers ei in uffeci voluntari. Tgei ha intimau Vus da candidar per quei post?
René Cavegn: Ei setracta d’ina uniun ella quala ch’jeu hai saviu seprofitar cun far turas e nezegiar l’infrastructura dallas camonas. La secziun ha fascinau mei cun sias purschidas multifaras da turas, cuors e pusseivladads da seperfecziunar. Astgar menar ina tala organisaziun ei ord mia vesta era ina honur.
Meis Vus savens els cuolms e per la pezza?
La stad mondel jeu a viandar, denton sundel jeu absolutamein negin specialist da reiver. Duront gl’unviern gaud’jeu secapescha las turas da skis. Las muntognas da nossa regiun porschan enormas pusseivladas.
Con bein enconuscheis Vus las duas camonas Maighels e Terri dalla secziun?
Jeu sun schon staus pliras gadas en omisduas camonas ed hai era pernotau leu. Enconuschientschas pli vastas e detagliadas mauncan denton entochen ussa. Jeu sun buca staus involvaus en projects ed aschia pli u meins sil medem stan sco ils biars commembers dalla secziun.
Il presidi da quella, cun sias biaras activitads, projects e duas camonas, pretenda in pulit engaschi sco voluntari, sper la professiun. Vegnan ussa las turas alla cuorta?
Quei sperel jeu propi buca. Empau respect dalla lavur che spetga mei hai jeu schon. Jeu sperel denton era da saver cumbinar la lavur per la secziun cun muments emperneivels e sentupadas amicablas, sco per exempel cun visitar las camonas ni prender part a turas menadas entras nos guids.
Ha il president niev dalla secziun Péz Terri certas finamiras principalas?
Segiramein ha l’infrastructura dallas camonas ina certa prioritad. Tier quella dil Terri duessan las lavurs vegnir terminadas tochen la stad 2026. Tier la renovaziun dalla camona da Maighels ei ina sligiaziun en vesta. Nus essan sin buna via cun elaborar in bien project niev. Ultra da quei giavischel jeu ch’ei gartegi da mantener la qualitad e la quantitad dallas activitads dalla secziun. Ulteriurs puncts impurtonts per mei ein era la buna structura finanzialas ed ina buna collaboraziun cun consuprastonts, guardia-camonas, guids, gidonters e commembers.
Apropos commembers: Gl’onn 2024/25 ha ei dau l’emprema gada ina digren, il diember ei sereducius per 34. Co valeteis Vus quei svilup?
Jeu manegel era ch’ei seigi l’emprema digren dapi biars onns. Ils motivs dallas 116 extradas ha la menadra dil register da commembers buca saviu eruir. Ina minoritad ha indicau motivs da vegliadetgna e sanadad, ina maioritad ha buca indicau ils motivs. Gl’onn vargau ein 82 persunas entradas ella secziun, ord mia vesta ei quei in diember cuntanteivel. Denton perdein nus onn per onn era in bien diember. Nus vegnin a stuer analisar quei fatg e tenor resultat prender las mesiras necessarias.
Gust da leger dapli?