Tuortas per la China e l’India enstagl per l’America
Ch’ei seigi 39 ni 15 % – ils dazis dils Stadis Uni dall’America ein aschia ni aschia buca supportabels per la Conditoria Sedrun-Switzerland. Mo pervia da quei ha il possessur e meinafatschenta Reto Schmid buca tratg la faultsch el canvau. Il cuntrari: «Jeu hai recaltgau nova clientella surtut en Svizra e cun interpresas dall’India sun jeu medemamein en contact. Ils meins november e december hai jeu diesch collaboraturas e collaboraturs supplementars.»
La communicaziun ch’ils Stadis Uni dall’America pretendien dalla Svizra in dazi da 39 % sin biars products ha schoccau bein enqual interpresa svizra. Aschia era la Conditoria Sedrun-Switzerland da Reto Schmid (51): «Quella decisiun ha fatg gronds quitaus a mi.» Ad el era ei numnadamein reussiu d’empustir contacts concrets cun in’interpresa dils Stadis Uni dall’America per saver furnir leu regularmein tuortas pintgas. Dacuort han ils Americans decidiu da sbassar il dazi da 39 sin 15 %, mo era quel resta ina barriera. «Cumpriu la differenza da valuta ch’ei sedada dapi l’entschatta digl onn dil franc svizzer sil dollar tschintschein nus aunc adina d’in surpli da cuosts da rodund 30 %. Per nus ei quei semplamein memia bia», di Reto Schmid. Sin fundament da contracts fatgs avon igl alzament dil dazi ha si’interpresa saviu furnir dus containers pleins cun tschiens mellis tuortas pintgas els Stadis Uni dall’America. «Tier quei eis ei denton restau. Il mument ei la fatschenta culs Americans sil glatsch», di el.
Buca l’emprema crisa
Il meinafatschenta tuatschin iniziativ ha denton buca schau stermentar dallas novitads negativas da l’autra vart dalla mar: «Dapi che nus havein aviert il baghetg niev miez digl onn 2020 havein nus surmuntau tschun crisas: Corona, ils problems da saver importar en Corea dil Sid damai ch’il Canal da Suez era vegnius serraus, l’uiara ell’Ucraina, l’uiara en Gaza ed ussa ils problems dils dazis culs Stadis Uni dall’America. Cun products en Corea dil Sid – per dir in exempel – fagevan nus ina fetg biala sviulta. Quella ei curdada d’in di sin l’auter damai ch’ils prezis cul transport en containers ein s’augmentai considerablamein.» Vidlunder seigi vegnida ina schliata raccolta da nitscholas: «Enteifer 24 uras ei il prezi per quellas carschius pil dubel.»
En contact cull’India
El decuors dils davos tschun onns ha Reto Schmid diversificau sia paletta da products. Ed el ha era tschercau nova clientella. «Nus furnin products en China e cun interpresas dall’India essan nus en contact. Cun quellas tiaras dat ei ina cunvegnientscha che lubescha a nus d’importar leu senza dazi», di Reto Schmid. Grazia alla preschientscha sin fieras internaziunalas seigi ei reussiu d’empustir buns contacts: «Leu essan nus vegni plidentai da fatschentas dall’India. Nus havein gnanc stuiu tschercar sez ellas.» Per la fiera ell’India vegnan medemamein tuortas pintgas en differentas variantas en damonda.
Diesch collaboraturs dapli
«Sper las tuortas pintgas savein nus furnir biars products da tschugalata allas pli differentas interpresas en Svizra. Leutier s’audan Migros, Coop, Lidl ed Aldi», di Reto Schmid. Schegie che la producziun pils Stadis Uni dall’America ei curdada naven dil tut, maunca la lavur daveras buca: «Il november e december havein nus engaschau diesch persunas dapli per puder dar il damogn a tuttas empustaziuns. Il mument essan nus en tut 55 collaboraturas ni collaboraturs.»
Sper la furniziun da products als detaglists gronds, sviluppescha la Conditoria Sedrun-Switzerland era products per differenta clientella. «Nus havein il certificat da qualitad internaziunal persuenter. Gest a fatschentas pintgas che han buca quel ni era buca confiseurs, savein nus porscher nies survetsch», declara possessur e meinafatschenta. La strategia cun ina clientella pli vasta e diversificada sepaga, mo era quella cun dapli products. Ina dallas petgas ein las lieurs da Pastgas: «Nus essan gia ussa vid producir lieurs. L’entschatta fevrer bandunan las empremas 280 000 lieurs nossa fatschenta ed aunc ina ga tontas vegnan furnidas pli tard ordeifer ni vendidas da nus.»
Festivau il giubileum da 60 onns
Dil reminent: Ils 15 da november 2025 ha la Conditoria Sedrun-Switzerland a Sedrun saviu festivar il giubileum da 60 onns. Ella vegliadetgna da 18 onns e culla patenta da pasterner en sac haveva il bab da Reto Schmid, Marcel Schmid, aviert la fatschenta a Sedrun e silsuenter extendiu ella successivamein ensemen cun sia consorta Adelina Schmid. Dapi 21 onns meina Reto Schmid cun success l’interpresa.
Gust da leger dapli?