Lectura Rumantscha

Reto Schmid remplazza l’America

Na, Reto Schmid na remplazza betg ils Stadis Unids da l’America cun ina da sias enconuschentas turtinas. Il possessur e mainafatschenta da la Conditoria Sedrun-Switzerland ha dentant chattà ina schliaziun per il martgà american ch’è dà en l’aua pervi dals dazis da Donald Trump. El exporta ussa simplamain en l’India ed en China tenor il motto «Make las turtinas great again».

In presidi cun accent sin las linguas

Stefan Engler è vegnì elegì ier glindesdi cun in resultat excellent sco president dal Cussegl dals chantuns. En ses pled ha el sco Surmiran accentuà l’impurtanza da las linguas: «Gist linguas minoritaras stgaffeschan solidaritad, in sentiment da vischinanza, perfin sur distanzas geograficas ora.» Uschia vegn suenter il Cussegl naziunal cun Martin Candinas segir er il Cussegl dals chantuns sensibilisà per il rumantsch.

Nov project, nova emprova

Cun brama spetgan las Terrianas ed ils Terrians da finalmain pudair renovar la chamona da Maighels sisum la Surselva. In project da la Secziun Piz Terri dal Club alpin svizzer ha gia fatg naufragi l’onn 2020. L’Uffizi federal d’ambient aveva lura francà ils plans, perquai che la chamona sa chattia en ina cuntrada da palids. In nov project da renovaziun da l’architect Gion A. Caminada duai uss avair dapli success.

A revair e bun divertiment cun la Lectura Rumantscha!