Premi solar per ina casa protegida

Avon 35 onns ei igl emprem premi solar dall’Agentura da solar svizra vegnius surdaus. Dapi lu ein varga 4000 projects vegni giudicai e rodund 500 han obteniu in premi. La surdada dils premis da quest onn ha giu liug ils 31 d’october 2025 a Genevra. Denter ils victurs sesanfla era in project a Segnas, numnadamein quel dalla Casa Carli Fry. El ei vegnius premiaus ella categoria sanaziun da baghetgs.

Premi per Casa Carli Fry

Sco l’Agentura da solar svizra constatescha ella publicaziun che cuntegn tuttas victuras e victurs, ei la Casa Carli Fry a Segnas in exempel per cultura da baghegiar vivida: «Ina casa da habitar sut protecziun dalla tgira da monuments muossa co la midada d’energia sa reussir era el context historic.» La Casa Carli Fry ei vegnida baghegiada entuorn 1700. Ella ei protegida dalla Confederaziun, il Cantun e la vischnaunca da Mustér. Il baghetg ei vegnius cumpletaus cun in indrez da fotovoltaica modern. «Quei ei in bien mussament ch’igl ei pusseivel d’anflar soluziuns per in’energia futura malgrad las directivas dalla protecziun da monuments», scriva l’Agentura da solar svizra.

170% dil diever

Sco l’agentura constatescha, furnescha igl indrez da fotovoltaica 170% dil basegns d’energia dalla casa e quei malgrad in scaldament d’electricitad existent. Ina battaria cun 20,2 kWh cun funcziun da current el seracass sco era in management d’energia intelligent optimeschan il diever d’energia. Il project da fotovoltaica ei ina part dil plan da sanaziun dalla casa che cumpeglia era il remplazzament dallas finiastras e dil sistem da scaldar.