«Quai es sco ün regal da Nadal per nus»

«Nus eschan fich cuntaints cun la decisiun dal Güdisch superiur dal Grischun e ch’el ha refüsà il recuors concernent il dret da vuschar in connex cun la scoula Müstair. Quai es sco ün regal da Nadal per nus», disch Gabriella Binkert Becchetti, la presidenta cumünala da Val Müstair. Però scha quai es uossa propa il punct da partenza final pel proget da renovaziun per la scoula a Müstair, quai nun es amo cler. Ils recurrents han nempe amo 30 dis temp per tour posiziun a la decisiun dal güdisch ed in cas eir amo trar inavant il cas a Losanna.

Referendum e recuors

Fingià la fin da marz d’ingon varà la suprastanza cumünala da Val Müstair pensà da finalmaing avair ragiunt il böt final in connex cul futur da scoula Müstair. In occasiun d’üna radunanza cumünala vaiva la populaziun nempe dat glüm verda per ün credit da 6,9 milliuns francs per la renovaziun da l’edifizi. Fingià fin a quel punct esa stat plütöst ün lung viadi pel proget: La suprastanza as dedichescha nempe fingià daspö passa tschinch ons dal futur da la scoula illa Val Müstair, e la tractanda e la preschantaziun dal proget final d’eiran avant la radunanza cumünala quist marz fingià gnüdas spostadas duos jadas. Il böt dal Cumün da Val Müstair es nempe dad unir tuot il s-chalins suot ün tet in üna scoula cumplessiva, adattada als bsögns dal Plan d’instrucziun 2021. L’edifizi previs per quist proget es apunta la chasa da scoula da Müstair.

Ma il viadi es i inavant ed i sun gnüts scrits ulteriurs chapitels da l’istorgia: La fin d’avrigl 2025 es nempe gnü inoltrà ün referendum pro la chanzlia cumünala chi’d ha pretais cha la decisiun gnia amo üna jada davant l’urna. Implü ha la squadra chi’d ha tut il referendum amo inoltrà ün recuors concernent il dret da vuschar pro’l Güdisch superiur dal Grischun. La populaziun da Müstair ha listess decis als 25 da mai 2025 davart il credit da 6,9 milliuns francs, lura vaivan 61 % da la populaziun da Val Müstair dit SCHI a la renovaziun da la scoula.

Temp 30 dis per tour posiziun

Ün dals iniziants dal referendum sco eir dal recuors concernent il dret da vuschar, Reto Roussette, ha eir be güsta quist lündeschdi surgni las nouvas da Cuoira, eir scha la decisiun dal güdisch es tenor la sentenza fingià gnüda tratta als 21 da november 2025. «Nus stuvain uossa evaluar la situaziun in detagl, causa cha nus vain pür surgni la decisiun per posta als 1. december 2025. Tenor nos avis nun es l’argumantaziun dal güdisch in connex cun tscherts puncts tant detagliada e profuonda», disch Reto Roussette ed agiundscha: «Nus vain uossa temp 30 dis per trar inavant il cas davant il Güdisch federal a Losanna – e nus ponderain scha nus lain eir far quel pass.»

Fosas e massa pacas infuormaziuns

Tanter oter nu d’eiran ils recurrents d’accord cun l’agir da la suprastanza e quai impustüt in connex cul möd d’infuormar la populaziun dürant tuot il svilup dal process in connex cun la scoula a Müstair. Uschea haja pels recurrents mancà üna sairada d’infuormaziun chi vess preschantà detagliadamaing il proget cun cuosts da 6,9 milliuns francs ouravant a la radunanza cumünala. Ed implü saja la missiva da la suprastanza – tant per la radunanza sco eir per la votaziun a l’urna – tenor lur parair statta fosa. «Implü nun ha la suprastanza fin hoz na pudü muossar quant cha la scoula cuostarà a la fin al cumün e cun che contribuziuns chi’s possa far quint. Ed ultra da quai nun es fin hoz na amo scleri che chi capita culla chasa da scoula a Sta. Maria, davo cha tuot ils s-chalins sun units a Müstair suot ün tet», disch Reto Roussette.

Ingün retard causa il recuors

Il punct chi fa il plü grond plaschair a Gabriella Binkert Becchetti es la conferma dal güdisch cha’l Cumün da Val Müstair haja infuormà bain dürant tuot il process in connex cun la scoula da Müstair. «E quai es per mai persunalmaing – ma eir per tuot l’administraziun cumünala – ün sen cha nus fain inandret nossa lavur. Ma eir ün sen cha nos organ d’infuormaziun e publicaziun – il Mas-chalch – spordscha avuonda infuormaziuns a las abitantas ed abitants da Val Müstair chi’s vöglian eir orientar davart noss progets e chi legian nossas publicaziuns», disch la presidenta.

Scha’ls recurrents nu vessan da trar inavant la decisiun dal Güdisch superiur dal Grischun, lura voul il Cumün da Val Müstair direct cumanzar cun la renovaziun davo ils 30 dis. Dimena da scriver oura las lavurs pel proget sco eir fingià da cumanzar a sbodar la veglia entrada da la chasa da scoula a Müstair. Eir scha’l recuors ha chaschunà ün pitschen retard dal proget, esa tenor Gabriella Binkert Becchetti amo adüna planisà da terminar la renovaziun pel cumanzamaint da l’on scolastic 2027/28.