Sfunsar an ragurdientschas d’unfànza

Igl vendargis, igls 21 da november 2025, âni musso igls unfànts da diferaintas vischnàncas da la Val Schons, tge c’els vevan amprieu. Var diesch canzùns, cunaschaintas da films da ­Disney, ân els canto par tudestg, angles a rumàntsch. La canzùn «Igl zercel da la veta» (digl film «Igl retg digls liùns»), translatada digl angles, e vagnida cantada par l’amprem’eada par rumàntsch – peia egna premiera mundiala!

An mintga canzùn â’gl do solists c’ân gieu la curascha da cantar tut sulets avànt igl publicum. L’aula e stada fulanada, sper igls bàncs earan plazadas sutgas suplementaras, ad igls unfànts, c’ân visito igl conzert, en sasieus da la vart sen la mobiglia sco las gagliegnas.

Igls 15 gianirs ân canto, igl clavazegn â acumpagnieu a la dirigenta â ancurascho igls visitaders dad ear cantar cun els. Canzùns cunaschaintas sco «Probier’s mal mit Gemütlich­keit» ân striuno egn rir an lur fatscha – a savens e’gl sto l’egn u l’oter or digl auditori c’â ear canto.

Egn duo musical

La cumbinaziùn da Claudia Trepp-Clopath, Mirjam Mark a lur musica e bagn ancunaschainta an la valada. Durànt seat ons ân las duas amitgas mano igl cor d’unfànts «Infancy», quegl ca mùnta tànt sco unfànza. Mo suainter la pandemeia da corona ân ellas duas stuieu zeder cun malaveta lur cor «Infancy».

Bi da giuvnas annà fagevan las duas femnas bugent musica, cunzund anzemel. Ellas ân prieu da s’ancanuscher an scoleta ad ân mena sapears or da vesta. Claudia Trepp-Clopath â adigna giudieu da far musica. Ear oz tgànta ella savens a nozas, batesems ad ear ad otras ocasiùns – igl ple bugent cun la sia amitga. «Jou giod da far musica cun la Mirjam, quegl e egn tains aschi custevel!» Sieus îls targlischan, durànt c’ella raquenta da lur projects cuminevels.

Egna tgea par la musica

La «Fundaziùn Tgea da tgànt» organisescha mintg’on, an colavuraziùn cugl Parc natiral ­Bavregn, igls «Gis da tgànt par unfànts». ­Benedikt Joos, igl manader digl project «Tgea da tgànt», declara: «Par l’egna e’gl impurtànt da mantaner igl lungatg ad igl tgànt rumàntsch, a par l’otra lagn nus sensibilisar la generaziùn giuvna par quel. Cun igls ’Gis da tgànt’ cumbinainsa amaduas intenziùns.»

A Maton stat la tgea paterna digl cumponist ad autur da Schons Tumasch Dolf (1889 – 1963). Da seat ons annà exista la «Fundaziùn Tgea da tgànt» c’a la fegnamira da realisar an quella tgea egn zenter da cumpetenza par la producziùn musicala rumàntscha. An la fasa da project actuala e’gl spezialmeing impurtànt da render vasevel igl potenzial da la «Tgea da tgànt» fagiànd ocurenzas. Igl vast program cultural cuntegna par exaimpel luvratoris, conzerts ad exposiziùns a gida a mantaner a svilupar igl relasch musical da la regiùn. Tres antocen sis ocurenzas culturalas par on organiseschan Benedikt Joos a la sia squadra da la Fundaziùn par rimnar daners. Igls «Gis da tgànt» vignan realisos cun sustegn da diferaintas donaziùns a cun agid da sponsurs, sco par exaimpel digl Parc natiral Bavregn. «Igl miglier plen a mei igls îls targlischaints digls unfànts da la sera da conzert!», â Benedikt Joos getg igl vendargis.

Exerzito canzùns an curt tains

Igls unfànts a las manadras digl cor da project ân fatg egna detga luvrada a caschùn da las provas da tgànt durànt igl november 2025. Exerzitar canzùns an curt tains a cantar quellas avànt tànta glieud, dovra curascha. Igls 15 giuvens cantadurs da la Val Schons ân musso tge c’e pussevel cun pocas provas: Crear egn conzert an tres lungatgs ca lascha sfunsar igls auditurs a las audituras an ragurdientschas d’unfànza.