Davo «otto mesi» ün «Café Bazzi» i’l Linard a Lavin

Chi saja bainquant in movimaint, esa scrit in ün «petit communiqué» sülla pagina d’internet da l’Hotel Linard a Lavin publichà in november. «Ma nus spettain cun pazienza d’infuormar concretamaing», vegna lura amo agiunt in quella pitschna comunicaziun. E Hans Schmid, mainagestiun da l’hotel e president da la Pro Linard SA chi posseda l’immobiglia, nu voul sün dumonda amo tradir daplü davart il process da successiun: «Eu nu less far l’oracul. Ma nus ans ingaschain fermamaing per chi detta üna successiun, davo nos ingaschamaint.»

Inspiraziun viennaisa per la stagiun d’inviern

Uossa al principi da december sun passats ils «otto mesi» cha Hans Schmid vaiva annunzchà quista prümavaira sco cumgià davo 19 ons i’l Hotel Linard – la dernière nomnada uschea perquai cha l’hotel d’eira gnü drivi amo üna ultima jada per ot mais. Ma al cumgià segua amo ün epilog: Dürant l’inviern dvantarà l’Hotel Linard il «Café Bazzi» – üna chasa da cafè a la viennaisa. «Quell’idea nu’s basa be sün mia paschiun per Vienna», disch Hans Schmid, «ma ha eir üna dimensiun seriusa in vista a la dumonda, che chi pudess esser ün concept chi porta per quista chasa.» Chi’s possa eir i’l Café Bazzi tschnar, disch Hans Schmid, «simplamaing plü simpel co avant». Ed impè da reservar üna maisa per sai as sezzaraja lur vi d’üna da las grondas maisas cumünaivlas chi han intant miss ad ir illa sala dal restorant.

Ma eir scha l’Hotel Linard as transmüda per l’inviern in ün cafè viennais, pernottar as poja là listess amo. «Las stanzas restan part da la sporta. Cun l’idea dal ‹Café Bazzi› pudaina balantschar oter ils bsögns dals giasts e las structuras da la gestiun», disch Hans Schmid. «Uschea pudaina offrir üna sporta chi nu pretenda tant persunal sco quella d’ün hotel cunvenziunal.»

«Iniziativa Lavin»: be amo ün’algordanza 

Co inavant cun l’Hotel Linard, ma eir culla Chasa Bastiann e cun l’anteriur Hotel Crusch Alba, las duos otras chasas in possess d’impraisas da Hans Schmid? Quella dumonda vaiva fat in gün da quist on eir l’Iniziativa Lavin, üna società chi’s vaiva ingaschada per spazi da viver e pel svilup dal cumün. 

«Schi nu’s fa nüglia, lura capita la müdada da dadoura. Ma schi’s vain svess activ, as poja eir influenzar quella müdada.» Quai vaiva dit quella vouta Jason Studerus invers la FMR (guarda La Quotidina dals 20 gün 2025) in connex cun l’annunzcha chi gnia tscherchada üna successiun per l’Hotel Linard. El d’eira suprastant da l’Iniziativa Lavin e vaiva insembel cun Jasmin Hauser, Nils Wohlwend e Tobias Schwarz invidà ad üna sairada da dialog illa sala da gimnastica. Var 30 abitantas ed abitants d’eiran seguits a quel invid per tscherchar insembel ideas e propostas per revitalisar il cumün – ed explicitamaing eir a reguard las chasas chi sun scrittas oura. Quella vouta d’eira eir gnüda articulada l’idea da fundar üna cooperativa per lura cumprar l’hotel o forsa eir tuottas trais chasas. Capità nun esa però plü bler.

Società sainza suprastanza funcziunala

Intant abita dals quatter suprastants da l’Iniziativa Lavin be plü Tobias Schwarz a Lavin. Tschels trais han bandunà il cumün ed eir la suprastanza da la società. La pagina d’internet da l’Iniziativa Lavin nun exista plü. Vi da l’idea da tour il destin dal cumün in agens mans, regorda intant be plü la pagina d’internet da Jason Studerus. Là vain preschantada l’Iniziativa Lavin sco referenza da sia lavur e descritta sco «proget chi muossa, co cha preschantaziun, lingua e strategia rinforzan l’identità locala e fan dvantar palpabel ün narrativ».

«L’Iniziativa Lavin nun es pel mumaint plü operativa», disch Tobias Schwarz sün dumonda. «Cun quai ch’eu sun uossa sulet in suprastanza nun accumplischa la società plü ils agens statüts. Nus faran la fin da l’on üna radunanza generala per dumandar sch’inchün oter füss pront d’entrar illa suprastanza. Scha na nu resta nüglia oter sco da schoglier la società.»

Üna funcziun da «service publique»

Ma chi oter pudess lura surtour la gestiun da l’Hotel Linard e forsa güst eir la Chasa Bastiann e’l vegl Hotel Crusch Alba? «I sto esser inchün chi po garantir persistenza», disch Hans Schmid, «inchün chi nun ha be il flà per duos ons e lura as muossa chi nu d’eira daplü co manià bain.» Tenor l’hotelier surpiglian pitschnas ustarias e pitschens hotels sco il Linard eir üna funcziun da «service publique». «Quels fuorman il provedimaint turistic da basa, pisseran per vitalità in cumün e per l’attractività da la regiun. Ma sportas da ‹service publique› nu sun per se rendablas e nun as portan svess.» Chi fetscha dabsögn eir d’idealissem e cha’ls interessents sajan pronts da güdar a portar in möd substanzial la gestiun. 

In lügl ha Hans Schmid descrit illa publicaziun da vendita che cha quai pretenda: «Preferi es la surdatta da la gestiun ad impressaris, mecens o fundaziuns.» Proponü vain illa publicaziun ün «share-deal», la vendita da las partecipaziuns vi da la Pro Linard SA cun tuot las valurs da facultà e tuot las obligaziuns, na la vendita be da l’immobiglia chi ha tenor stimaziun uffiziala üna valur actuala da s-chars 5,2 milliuns francs.

Chattar üna successiun fin prümavaira

Ün’instituziun chi ha invers la FMR confermà d’esser in ün barat per sgürar l’existenza da l’edifizi es la Fundaziun Edith Maryon da Basilea. Quella s’ingascha per retrar immobiglias da la speculaziun per lura pussibiltar ün’ütilisaziun radschunaivla our d’vista sociala. «Premissa per sgürar ün’immobiglia es chi vegnan insembel avuonda donaziuns», scriva Ulrich Kriese da la Fundaziun Edith Maryon sün dumonda, «intant nun es quai però amo il cas.» Cha l’Hotel Linard saja üna località bellischma, illa quala i gnia fat lavur culturala preziusa, agiundscha’l amo. «Nus salüdessan schi gratiess da mantegner quai eir pel futur.»

Hans Schmid da sia vart ha scrit i’l «petit communqué» chi haja dat discuors cun var üna dunzaina d’interessats concrets. «Intant cha’ls üns approfundischan variantas e partecipaziuns, han oters darcheu tut distanza», scriva’l inavant. E disch lura amo: «Quels chi sun amo interessats han propi grond interess.» L’intenziun resta da chattar fin da prümavaira üna successiun.