Lectura Rumantscha

Gia ussa Nadal en Val Müstair

In recurs concernent il dretg da vuschar ha franà la renovaziun da la scola da Müstair. La populaziun aveva atgnamain gia decis il matg davart il credit da 6,9 milliuns francs per quellas lavurs. Recurrents eran dentant da l’opiniun che la vischnanca n’haja betg infurmà endretg davart il project. Uss ha la Dretgira superiura dal Grischun refusà il recurs. Per Gabriella Binkert Becchetti, presidenta communala da Val Müstair, è quai sco in regal da Nadal. Dal tut Nadal n’èsi dentant anc betg, ils recurrents pon anc trair vinavant il cas davant il Tribunal federal.

In pelegrin ed ambassadur dal rumantsch

Il cantautur Mario Pacchioli ha dà la fin d’emna trais concerts en sia patria sursilvana. Sco ch’il redactur da la FMR scriva, sajan quai stads concerts fitg famigliars. Mario Pacchioli ha avert sia valisch musicala e laschà reviver la musica da sia uffanza fin a las chansons da sia vita actuala. Il pelegrin tranter la Frantscha e la Svizra franzosa raquinta en in’intervista era da ses novs projects, tranter auter sia rolla sco ambassadur dal rumantsch.

La centrala dal Bambin

«Char Bambin, jau avess gugent ina poppa.» – Ina tala brev adressada al Bambin na finescha betg, sco che ti pudessas pensar, en il chanaster da palpiri da La Posta – il cuntrari. La brev va, en cas ch’ella ha in’adressa da speditur, a Cadenazzo en il Tessin, ins pudess dir en la centrala da posta dal Bambin. Là respundan otg collavuraturas e collavuraturs da La Posta tuttas brevs ed agiunschan schizunt anc in regalin. Tgenin, na tradescha La Posta dentant betg. Magari stos era scriver ina cartulina al Bambin per scuvrir il misteri.

A revair e bun divertiment cun la Lectura Rumantscha!